Што го движи пулсот на криптопазарот покрај цената на биткоинот

Додека цената на биткоинот, изворната и највредна криптовалута во светот, останува во фокусот на повеќето извештаи за дигитални средства, инвеститорите и аналитичарите укажуваат дека овој показател не е единствениот што треба да се следи при процена на вистинската состојба на криптопазарот. Во ера на растечка институционализација на секторот и промени во регулативата, следењето подлабоки и понекогаш занемарени метрики може да биде од клучно значење за стратешко позиционирање.

Вредноста на биткоинот често е најгласниот индикатор, и тоа не треба да се негира. Дури и клучен, според зборовите на Страхиња Савиќ, раководител на одделот за податоци и аналитика во ФРНТ (FRNT), платформа за криптовалути фокусирана на институционални клиенти.

На прашањето на „Блумберг Адрија“ кои пет параметри би ги издвоил како најважни за добивање поширока слика за перформансите и издржливоста на криптосекторот, а кои не се нужно поврзани со цената на биткоинот, тој наведува дека анализата на долгорочната вредност на оваа криптовалута сепак не може да се избегне и ја истакнува како главен фактор.

„Долгорочната цена на биткоинот е клучен индикатор за здравјето не само на биткоинот туку и на целиот криптосектор. Цената на биткоинот ги повлекува сите други процеси – од расположението и ликвидноста до развојот на инфраструктурата и активноста на пазарот. Клучно е, сепак, да се фокусираме на долгорочни трендови, а не на краткорочни осцилации предизвикани од поединечни вести. Гледањето како се однесува биткоинот во период од шест месеци или една година дава многу појасна слика за состојбата на пазарот“, објаснува Савиќ.

Криптоаналитичарот и коосновач на ЦТБ (CTB Crypto & Consulting), Иван Андрејевиќ, напоменува дека, иако биткоинот е важен како водечка криптовалута и пазарен индикатор за расположението, тој не ја дава целата слика. „За оние што го следат развојот на криптоекосистемот, било како инвеститори, истражувачи или ентузијасти, важно е да се разгледа поширок спектар на показатели што откриваат трендови во индустријата“.

Андрејевиќ во изјава за „Блумберг Адрија“ исто така ги наведува своите пет водечки насоки за согледување на криптосферата. Регулаторниот аспект и големината на пазарот на стабилни коини се показатели што и двајцата соговорници ги издвојуваат како неизоставни.

Кои би биле другите фактори?

• Состојбата со стабилните коини

Савиќ ја спомнува вкупната вредност на стабилните коини во оптек. „Стабилните коини, особено оние врзани за американскиот долар, стануваат дигитално продолжение на американската валута. Нивната вкупна пазарна вредност е индикатор за побарувачката за доларска ликвидност на блокчејн. Американските власти сè повеќе гледаат на стабилните коини како на средство за глобално ширење на доларот. Растот на оваа категорија е јасен показател за институционално прифаќање и геополитичко значење на секторот“, објаснува тој.

Министерот за финансии на САД, Скот Бесент, минатиот месец на мрежата X нагласи дека стабилните коини можат да ја зајакнат, а не да ја загрозат доминацијата на доларот. Како што веќе пренесе „Блумберг Адрија“, Сенатот неодамна усвои закон за регулирање на стабилните коини, што беше дочекано како значајна победа за криптоиндустријата и политиката за промоција на дигиталната имотна класа на претседателот Доналд Трамп.

Андрејевиќ исто така смета дека стабилноста и уделот на стабилните коини на пазарот се важни во овој контекст. „Стабилните коини, како USDT, USDC, DAI и други, претставуваат основа на повеќето трансакции на криптопазарот, како и врска со фиат-економијата. Нивната ликвидност, пазарен удел, транспарентност на резервите и однесување во волатилни периоди се показатели за довербата во пазарот“.

Depositphotos

Стабилните и сигурни дигитални коини од овој тип овозможуваат функционалност на пазарот, тргување и обезбедување ликвидност, оценува тој и додава дека ако екосистемот на стабилните коини функционира без проблеми, тоа е одличен показател за стабилноста на пазарот.

• Каматни стапки

Савиќ потоа ги истакнува каматните стапки во светот на криптото.

„Разликата помеѓу каматните стапки во криптоекономијата и традиционалните финансии кажува многу за пазарните фрикции. Во криптосветот каматите често се повисоки бидејќи доларите потешко влегуваат во тој систем и затоа што постои повисок перципиран ризик. Како што се намалува таа разлика, тоа укажува на посилна интеграција на криптото со поширокиот финансиски систем“.

• Регулација

Тука се и регулаторната рамка и со тоа поврзаната правна интеграција, продолжува Савиќ.

Кога станува збор за регулативата, соговорникот потсетува дека законската рамка го обликува просторот за учество на институционалните инвеститори. „Во моментов гледаме дека САД предничат во правното дефинирање на криптопазарот, што ги отвора вратите за банките, фондовите и другите актери да учествуваат легално и побезбедно. Регулативата е предуслов за стабилна побарувачка од традиционалните финансиски пазари“.

Bloomberg

За коосновачот на ЦТБ, регулативата и интересот на институционалните инвеститори во моментов можеби се и најважниот фактор што ги одредува долгорочната одржливост и прифаќање на дигиталната имотна класа. „Донесувањето закони и правилници од страна на водечките економии, како што се САД, Европската Унија или многу азиски земји, во голема мера влијае на намалување на ризикот, тековите на капиталот, доаѓањето на институционални и професионални инвеститори – со што се зголемува ликвидноста, како и структурата на пазарот“.

Покрај веќе споменатите поместувања во областа на стабилните коини годинава, треба да се напомене дека и минатата година во САД беше една од клучните во доменот на регулацијата на дигиталните средства. Имено, 2024 година започна со лансирање на првите спот биткоин берзански фондови (англ. exchange-traded fund - ETF) во таа земја, што криптозаедницата го очекуваше веќе десет години.

Дебито на фондовите што директно инвестираат во етер, втората највредна криптовалута во светот, се случи околу половина година подоцна. Она што тогаш, меѓу другото, одигра клучна улога за Комисијата за хартии од вредност на САД да даде зелено светло за ЕТФ-овите беше влезот на финансиски гиганти како „Блекрок“ (BlackRock), односно нивното пријавување за лансирање вакви фондови.

Depositphotos

„Институционалниот влез преку производи како биткоин ЕТФ-ови, лиценцирани криптоберзи и фондови, носи стабилност, помала волатилност, но и најважното – признание и легитимитет на целиот сектор“, нагласува Андрејевиќ.

• Активности на блокчејн-мрежите

Тој потоа вели дека „ончејн“ (on-chain) активноста и бројот на активни паричници се многу важни показатели за следење.

„Количеството на активност на блокчејн-мрежите кажува многу повеќе од самата цена на токенот. Растечкиот број на активни адреси и трансакции укажува на реална употреба на одредена криптовалута и инфраструктурата што таа ја нуди“, наведува тој.

Затоа, според него, многу е важно фокусот да се стави на оние што имаат реална употребна вредност. 

„Метрики како бројот на дневно активни паричници, бројот на трансакции, потрошувачката на 'gas fee' (на мрежи како етереум) и просечната големина на трансакциите помагаат во процената дали криптовалутите се користат за плаќања, DeFi (децентрализирани финансии) или други апликации, или се чуваат во паричници како инвестиција. Тоа е важно бидејќи растечкиот 'ончејн' екосистем навестува пошироко прифаќање во светот и поголема доверба на корисниците во технологијата“, вели соговорникот.

• Вкупна вредност на средствата „заклучени“ во системот DeFi

Андрејевиќ го следи и DeFi TVL (англ. Total Value Locked – вкупна вредност „заклучена“ во децентрализираниот финансиски систем).

Bloomberg

„Може да се каже дека децентрализираните финансии се срцевината на Web3 индустријата, а ТВЛ (TVL) ја претставува вкупната вредност на средствата заклучени во паметни договори на протоколи како Aave или Uniswap. Движењето на ТВЛ ви дава директен увид во тоа колку пазарот е подготвен да заклучи капитал во децентрализирани системи, без посредници. Растот на ТВЛ укажува на растечка доверба на корисниците и инвеститорите во децентрализираните протоколи, што е многу важен показател за усвојувањето одредени Web3 екосистеми“, објаснува тој.

• Нови проекти и инвестиции

Бројот и квалитетот на нови Web3 проекти и VC (англ. venture capital – ризичен капитал) инвестиции е исто така значаен, нагласува тој, бидејќи инвестициите во иновации се темел на секој технолошки сектор – па, така, и на криптопазарот.

„Следењето колку нови Web3 проекти со реална употребна вредност се создаваат и колку капитал влегува во секторот, ни дава директен увид во тоа што очекува пазарот од иднината на оваа индустрија. Бројот на 'GitHub commit', хакатони, грант-програми и стартап инкубатори дополнително го зголемува нивото на активност и креативност во заедницата. Иновацијата и развојот се од големо значење за долгорочната одржливост на проектите. Ако проектите и понатаму се финансираат и развиваат, тоа значи дека секторот има иднина, без оглед на краткорочните цени на токените“, заклучува Андрејевиќ.

• „Хаш рејт“

Bloomberg

Конечно, Савиќ ја заокружува својата листа на водечки пет мерила што треба да се следат со уште еден критериум поврзан со биткоинот. Станува збор за таканаречениот „хаш рејт“ (hash rate), кој ја мери вкупната компјутерска моќ вложена во рударењето биткоин.

„Тоа е енергетски израз на довербата во долгорочната вредност на биткоинот. Растот на 'хаш рејтот' значи дека рударите низ светот се подготвени да трошат повеќе ресурси за да произведуваат биткоин. Повисок 'хаш рејт' укажува на побезбедна, поотпорна и подецентрализирана мрежа“, заклучува тој.

* Сите информации се од општ карактер и не претставуваат инвестициски совети.