.webp){kind=icon}
Каматите на хипотекарните кредити во САД го имаа најголемиот неделен пад во речиси 41 година, обезбедувајќи одредено олеснување по брзиот раст што ги притисна цените во претходниот период.
Просечната фиксна каматна стапка за 30-годишна хипотека изнесува 6,61 отсто, што е најниско ниво по речиси два месеци, велат од компанијата за недвижности, „Фреди Мек“. Минатата недела просекот беше 7,08 отсто.
Резултатите одразуваат промена во методологијата на „Фреди Мек“ за која од компанијата велат дека ќе обезбеди поширок и попрецизен преглед на пазарот на хипотеки. Наместо да ги испитува заемодавците, сега користи податоци собрани од автоматскиот систем за преземање по што ги пресметува просечните стапки.
Трошоците за задолжување го следеа падот на приносите на 10-годишните државни обврзници, откако владата минатата недела објави дека инфлацијата се намалила во октомври. Инвеститорите ги гледаат податоците за потрошувачките цени како знак дека Федералните резерви може да почнат да ги ублажуваат зголемувањата на каматните стапки во наредните месеци. Претседателот на ФЕД, Џером Пауел, сепак, рече дека е прерано да се размислува за тоа.
„Хипотекарните стапки паднаа оваа недела бидејќи дојдоа податоци кои сугерираат дека инфлацијата можеби го достигнала врвот“, вели Сем Катер, главен економист на „Фреди Мек“. „Иако падот на хипотекарните стапки е добредојдена вест, пазарот на недвижности има уште долг пат да помине. Инфлацијата останува висока и Федералните резерви веројатно ќе ги задржат каматните стапки високи, а потрошувачите ќе продолжат да го чувствуваат влијанието“.
Стапките на хипотеките кои се удвоија оваа година ја намалија побарувачката за домови, предизвикувајќи градежниците да се повлечат од изградбата и принудувајќи ги продавачите да ги намалат цените. Додека најновиот пад на стапките нуди мала релаксација на пазарот, неодамнешната нестабилност на трошоците за задолжување „предизвикува голема несигурност“ и кај барателите на домови и кај сопствениците кои размислуваат да ги огласат своите имоти, рече Џорџ Ратиу, директор за економски истражувања на Realtor.com.
„Некои купувачи можеби ќе сакаат да почекаат и да видат дали цените дополнително ќе паднат“, вели Ратиу. „Сепак, со инфлацијата сè уште на ниво над седум отсто и со ФЕД кој ќе продолжи да ги зголемува каматните стапки во следните неколку месеци, пазарот на хипотеки се уште има проблеми. Сè уште можеме да очекуваме дека ќе видиме како стапките се враќаат над седум отсто до крајот на годината “.
