Народната банка во континуитет ги зголемува каматните стапки, за да ја заузди инфлацијата, а потребно е време за тој раст на каматите да се прелее кај деловните банки. Бојан Цветановски, претседател на здружението за финансиски пазари „АЦИ Македонија“, во разговор за Блумберг Адрија ТВ вели дека повидлив раст на каматите кај деловните банки очекува во првата половина од следната година.
„Секако дека е потребно одредено време, механизам на трансмисија за сигналите од централната банка комплетно да се имплементираат кај деловните банки. Меѓутоа, ние веќе имаме движење на пазарот на пари, и на активната и на пасивната страна, значи и кај кредитите и кај депозитите има зголемување на каматните стапки од 100 до 200 базични бода кај одредени банки. Кај одредени банки, пак, допрва ќе настапат тие зголемувања. Меѓутоа, мислам дека тоа зголемување на каматите кај деловните банки ќе биде целосно имплементирано во првиот квартал од следната година. Така што, банките ќе го следат трендот и кредитите ќе поскапуваат“, вели Цветановски.
Во таа насока, Цветановски ја препорачува македонската валута како избор за штедење, особено затоа што денарот веќе има одредена каматна предност пред еврото.
„Сега македонскиот денар одново стана привлечен за штедење. Значи, каматните стапки на депозитите растат и ќе растат и понатаму. Македонскиот денар веќе има и одредена каматна предност во однос на еврото. А од странските валути, еврото би го одбрал прво како опција за штедење“, вели Цветановски.
Тој ја оценува како соодветна монетарната политика на централната банка.
„Нашата монетарна политика е сосема во ред. Јас не сметам дека се високи овие каматни стапки што сега ги имаме и се сметаат за високи, бидејќи ние сега треба да се потсетиме дека во изминатите десет години имавме ултраниски каматни стапки. Значи, беше период на ниски каматни стапки на ексклузивно евтини пари. Така што, јас ова сега за сега го гледам како една нормализација на монетарната политика. Не треба да заборавиме дека во 1990-тите години, па и во првите години од овој век имавме каматни стапки со двоцифрени броеви“, вели претседателот на „АЦИ Македонија“.
Тој очекува забавување на економската активност во Европа.
„Уште во летниот период имаше очекувања дека во еврозоната ќе настапи рецесија некаде во овој период, меѓутоа резултатите од еврозоната сè уште се позитивни. Значи, видовме дека во третиот квартал има позитивни бројки, односно БДП во еврозоната реализира пораст од 2,1 отсто. Веројатно ќе има забавување на економската активност во еврозоната, но во следните месеци останува да видиме во кој обем. Меѓутоа, јас би се согласил дека забавување ќе има“, вели Цветановски.
Со оглед на тоа што македонската централна банка ги следи чекорите на ЕЦБ, Цветановски очекува каматите во земјава да продолжат да растат до 5,5 проценти.
„Во Европа инфлаторната бројка сè уште расте. Според она што го гледам јас на финансиските пазари и на изјавите од ЕЦБ, вратите за натамошно зголемување на каматите се отворени, што веројатно ќе биде зголемување за 100 базични бода во следните шест месеци. Земајќи предвид дека нашата централна банка е во чекор со ЕЦБ, јас би рекол дека се согласувам со вашата проекција дека стапката 5,25 на благајнички записи е сосема реална. Јас би рекол дури дека можеби ќе оди и повисоко, до 5,50 евентуално“, вели Цветановски.
Целиот разговор погледнете го во видеото.
.webp){kind=icon}
Во моментов нема коментари за веста. Биди прв да коментира...