НБРМ ја зголеми основната камата на највисоко ниво во последните 13 години

Каматната стапка за аукцијата на благајнички записи, која е закажана за денеска, изнесува 6,15 отсто. Тоа значи дека на последната седница на Комитетот за оперативна монетарна политика, која се одржа во вторникот, уште еднаш е донесена одлука за затегнување на монетарната политика и за зголемување на основната камата.

Досега референтната камата изнесуваше 6 отсто, што значи дека последново зголемување изнесува 0,15 процентни поени. Ова е најмалото зголемување на каматната стапка од почетокот на монетарното затегнување. Претходните зголемување се движеа од 0,25 до 0,75 процентни поени.

Одлуката за нова промена на каматната стапка во разговор за „Блумберг Адрија ТВ“ кон средината на јули ја најави главната економистка во централната банка, Анета Крстевска.

Таа тогаш изјави дека во последните месеци се гледа забавување на инфлацијата во земјава, но дека врз основа на сите факти во првата недела во август ќе биде донесена одлука за референтната камата.

„Последните месеци имаме забавување и кај базичната инфлација. Можам да кажам дека движењето на инфлацијата е во согласност со последните проекции и ние и натаму очекуваме просечна инфлација од 8 до 9 отсто оваа година, што значи забавување во однос на лани, кога беше 14,2 отсто. А очекуваме тоа да продолжи и следната година, сè додека не дојде до она вообичаено просечно ниво“, вели Анета Крстевска, главна економистка во НБРМ.

Трендот на зголемување на каматната стапка почна во април минатата година. Дотогаш каматата изнесуваше 1,25 отсто и таа важеше цела година односно од април 2021 година.

Со последното зголемување на каматната стапка за 0,15 процентни поени, референтната камата на благајничките записи достигна највисоко ниво во последните 13 години.