Фед не ја промени каматната стапка - акциите надолу, обврзниците нагоре

Американската централна банка (Федералните резерви на САД – Фед), како што и се очекуваше, реши да не ја менува референтната каматна стапка и таа останува на целниот опсег од 4,25 до 4,5 проценти, соопшти предмалку Федералниот комитет за отворен пазар (Комитетот).

„Најновите индикатори покажуваат дека економската активност продолжи да расте со солидни стапки. Стапката на невработеност се стабилизира на ниски нивоа последниве месеци, а состојбата на пазарот на работна сила останува солидна. Инфлацијата останува донекаде покачена. Комитетот со своите мерки се стреми кон постигнување максимална вработеност и инфлација на ниво од два процента на подолг период. Сметаме дека ризиците за постигнување таква вработеност и инфлациските цели тешко се балансираат. Економските изгледи се неизвесни, со цел да ги оствариме нашите цели решивме да го задржиме опсегот на стапката на федералните фондови на нивото од 4,25 до 4,5 проценти“, изјавија од Комитетот.

Од Фед велат дека ќе продолжат да ги следат импликациите од информациите за економските изгледи што ќе доаѓаат допрва. „Комитетот е подготвен да ја приспособи монетарната политика доколку се појават ризици што ќе ги загрозат поставените цели“.

Како што пишува „Блумберг“, каматната стапка е горе-долу единствената работа што остана непроменета откако шефот на Фед, Џером Пауел, со своите колеги се сретна во декември 2024 година, кога последен пат се промени стапката. Со Доналд Трамп повторно во Белата куќа, околностите се сосема поинакви за носителите на монетарната политика на САД. Додека претходниот претседател Џо Бајден и неговите соработници речиси никогаш не ги коментираа каматните стапки, Трамп стана шампион во искористување на правото на врховниот лидер да дава свои видувања. Во 2019 година тој дури и жестоко го искритикува Пауел зашто не ги намалува каматните стапки, тврдејќи дека тој им е поголем непријател на САД и од кинескиот претседател.

Фед ја намали каматната стапка на трите последни состаноци за време на Бајден, кумулативно спуштајќи ја за еден процентен поен, со горната граница на целта од 4,5 проценти во моментов. Но, со најновите податоци за пазарот на трудот, кои се изненадувачки добри, и инфлацијата сѐ уште значително над целта на Фед од два процента, аналитичарите сметаат дека следно кратење на каматната стапка нема да се случи најмалку до март.

 

 

По објавата на одлуката на Фед, приносите на американските државни обврзници пораснаа незначително, додека акциите загубија нешто од вредноста.

Податоците за растот на БДП на американската економија за четвртиот квартал се очекуваат следниот ден по одлуката на Фед, но веројатно е дека економијата продолжила силно да расте под влијание на добриот пазар на труд и растечката потрошувачка, што е во корист на инфлаторните притисоци. Според индексот на инфлациски притисоци користен од Сент Луис ФРЕД, веројатноста за инфлација да надмине 2,5 проценти во следните 12 месеци скокна на 22 процента во декември од 5 проценти во ноември, додека веројатноста за пад на инфлацијата под 1,5 процент е занемарлива.

Фокусот на учесниците на пазарот е на следните потези, вели аналитичарката на „Блумберг Адрија“ Марина Петров Савиќ - имено, колку брзо ќе се спроведат тарифите, колку ќе се намалат даноците и како имиграциската политика ќе влијае на и онака затегнатиот пазар на трудот. Финансиските пазари имаа турбулентен почеток на неделата. Објавата на „Дипсик“ (Deepseek) ги потресе пазарите на капитал, особено технолошкиот сектор, кој имаше многу добра 2024 година, лансирајќи остар скок на индексот на нестабилност VIX на првиот работен ден од неделава.