Израелскиот напад на Иран е клучен тест за статусот на доларот како прибежиште

Под притисок од сите страни и со пукнатините во неговата глобална валутна доминација, главна тема за разговор на пазарот оваа година, традиционалната улога на доларот како кризно засолниште се соочува со клучен тест доколку ескалира нападот на Израел врз Иран.

Отстапувајќи од историските норми, доларот првично падна кога се појавија наслови дека Израел извршил воздушни напади врз ирански цели, пред на крајот да се засили за разлика од повеќето големи конкуренти.

Позицијата на САД како најголем светски производител на нафта веројатно помогна и поттикна закрепнување, со што фјучерсите за сурова ВТИ нафта пораснаа за 10 проценти.

Но, проценката на „Блумберг“ за вредноста на доларот вчера достигна најниско ниво во последните три години поради загриженоста за повисоките царини и влошувањето на изгледите за американската економија.

Популарната трговија „Продај ја Америка“ што погоди низа американски средства, од акции до државни обврзници, имаше големо влијание и помогна да се постават некои прашања за валутата како засолниште.

„Ознаката ‘безбедно засолниште’ - за средства како доларот и јенот - се потпира на три столба: економска стабилност, ликвидност и кредибилитет“, рече Хебе Чен, аналитичар во „Вентејџ маркетс“ (Vantage Markets) во Мелбурн. „Овогодишната слабост на доларот открива пукнатини во сите три“, додаде Чен.

Bloomberg Mercury

 

Индексот на доларот на „Блумберг“ оваа година падна за околу осум проценти бидејќи напорите на претседателот Доналд Трамп за реформа на глобалната трговија ја намалија довербата на инвеститорите во потенцијалниот раст на американската економија. Се очекува предложеното даночно законодавство да додаде трилиони долари на федералниот дефицит во текот на една деценија, додека улогата на Америка во безбедносните и политичките сојузи исто така е доведена во прашање.

„Една од темите што треба да се следи е дали атрибутите на доларот како безбедно засолниште се разредуваат од трговската политика на американската администрација, фискалното расипништво и предизвикувањето на владеењето на правото“, рече Родриго Катрил, стратег во „Нешнел Аустралија бенк“ (National Australia Bank Ltd.) во Сиднеј. Другата тема, во светлината на нападот на Израел, покажува како „САД се чини дека се оддалечуваат од водечката геополитичка улога, отворајќи ја вратата за другите да ја следат својата агенда.“

„САД не беа вклучени во израелските напади“, рече државниот секретар Марко Рубио, предупредувајќи го Иран да не ги таргетира интересите или персоналот на земјата како одмазда.

Доларот се искачи за 0,4 проценти во денешното азиско тргување, додека јенот флуктуираше, а швајцарскиот франк се искачи за 0,1 отсто. Златото, кое достигна рекорд во април, порасна за дури 1,7 проценти, а се искачија и државните обврзници.

Што велат стратезите на „Блумберг“?

„Нема толку да станува збор за засолништата, колку за фактот дека САД е најголемиот производител на нафта во светот. Со оглед на тоа што доларот штотуку достигна нов повеќегодишен минимум, сега може да се очекува самоодржливо искачување“, вели Марк Кадмор, стратег на „Маркетс лајв“ (Markets Live).

Пред нападот банките на Волстрит ги засилуваа своите повици дека доларот дополнително ќе ослабне, погоден од намалувањето на каматните стапки и забавувањето на економскиот раст. Пол Тудор Џонс, основачот на макро хеџ фондот „Тудор инвестмент“ (Tudor Investment Corp.) рече дека за една година американската валута може да биде за 10 проценти пониска бидејќи очекува краткорочните каматни стапки да бидат „драматично“ намалени во следната година.

Волстрит очекува подлабок пад бидејќи доларот се приближува до најниската точка од 2023 година.

Нападот на Израел означува голема ескалација по застојот околу атомската програма на Техеран. Иранските и американските преговарачи требаше в недела во Оман да ја одржат шеста рунда разговори, но Трамп неделава изјави дека е помалку уверен во шансите за договор.

„Клиентите сè повеќе прашуваат и дебатираат за улогата на доларот како засолниште во портфолијата“, рече Шоки Омори, главен стратег во „Мизухо секјуритис“ (Mizuho Securities Co.) во Токио. „Во зависност од тоа како администрацијата на Трамп го комуницира својот став за нападите - на пример, со сигнализирање на идно вклучување - постојат ризици дека државните обврзници и доларот може да се соочат со понатамошни распродажби“.