Глобалниот данок ја нагризува добивката на скопската „Стопанска банка“

„Стопанска банка“ од Скопје ја зголеми добивката за два отсто споредено со истиот период лани. Во финансискиот извештај за првата половина од годината се наведува дека банката „продолжи со остварување солидни резултати и висока профитабилност“ и остварена е добивка пред оданочување од 2.022.904 илјади денари.

„Согласно примената на регулативата за глобален данок кој ја засега, Стопанска банка пресметува данок со примена на ефективната даночна стапка од 15 отсто, кој претставува зголемување од 42 отсто во однос на истата категорија од минатата година и соодветно се одразува на намалување на добивката по оданочување“, се наведува во коментарот на финансискиот извештај.

Економските активности во првата половина од 2025 година се остварени во економскиот амбиент кој и натаму е придружен со неизвесност и постоечки а ризици за светската и за домашната економија, велат од банката.

Приходи и расходи

Нето-приходите од камати се намалени за 6 отсто во однос на истиот период од минатата година како резултат на намалените каматни стапки.

Нето-приходите од провизии и надоместоци се намалени за 7 отсто во однос на анализираниот период во 2024 година, како резултат на зголемените расходи од провизии кои ги наплатуваат добавувачите на соодветните сервиси и истовремено намалување на провизиите кај одредени сервиси во интерес на клиентите.

„И покрај сè уште присутните инфлациски притисоци и ценовни флуктуации, Банката продолжува со оперативна ефикасност во однос на контролата на трошоците од работењето. Притоа, останатите расходи од дејноста и трошоците за вработени изнесуваат 534.242 илјади денари и 647.608 илјади денари респективно и се за 10 отсто повисоки во однос на истиот период од претходната година“, наведуваат од банката.

Очекувања за претстојниот период

Најновите прогнози за светската економија за периодот 2025 – 2026 се ревидирани надолу во споредба со претходните процени, што укажува на посилно забавување на економскиот раст оваа година. Ризиците за растот се зголемени, додека за главни причинители се наведуваат засилениот протекционизам и зголемената неизвесност во трговските политики. Се предвидува дека побавното надолно приспособување на инфлацијата од очекувањата ќе има неповолно влијание врз финансиските услови, со што се зголемуваат ризиците поврзани со фискалната и финансиската одржливост.

Од друга страна, евентуалното намалување на трговските препреки, спроведувањето на регулаторните реформи со коишто би се намалил финансискиот товар на фирмите и на домаќинствата, разрешувањето на воените конфликти и посилното намалување на цената на нафтата се фактори коишто може да придонесат за повисок светски раст.

Во моментов нема коментари за веста. Биди прв да коментира...

Остави коментар