Трговци вложија 977 милиони долари во облог дека нафтата ќе падне

олем број инвеститори во текот на март направија агресивни обложувања дека цената на суровата нафта ќе опаѓа, но наместо очекуван профит, дел од нив се соочуваат со значителни загуби, во услови на продолжена геополитичка неизвесност.

Според пазарните податоци, речиси 977 милиони долари биле вложени во ProShares UltraShort Bloomberg Crude Oil ETF (SCO) - фонд кој обезбедува двојно инверзно движење во однос на дневните промени на цената на нафтата. Ова претставува најголем месечен прилив од неговото основање во 2008 година. Сепак, и покрај силниот интерес, фондот изгубил околу 41 отсто од вредноста во март, што е негов најлош резултат во последните шест години.

Во исто време, цената на суровата нафта брент значително порасна, достигнувајќи ниво од 119 долари за барел во текот на месецот, пред да се стабилизира на околу 102 долари на почетокот на април. И покрај ова благо намалување, цената останува значително повисока во однос на 72 доларa колку што изнесуваше на крајот на февруари.

Клучен фактор зад ваквите движења е конфликтот поврзан со Иран, кој предизвика сериозни нарушувања во глобалното снабдување. Особено е значајна ситуацијата во Ормускиот теснец - витален транспортен коридор преку кој минува околу една петтина од светската нафта. Аналитичарите предупредуваат дека дури и во случај на прекин на непријателствата, нормализацијата на снабдувањето би можела да трае со месеци, што би ги задржало цените на повисоки нивоа.

Дополнително, инцидентите во регионот продолжуваат. Во текот на неделата беше погоден нафтен танкер во близина на Катар, што предизвика пожар, иако подоцна бил ставен под контрола. Овие случувања дополнително ја зголемуваат неизвесноста на пазарот.

Во меѓувреме, оптимистичките инвеститори исто така вложуваат значителни средства. Фондот УСО (United States Oil Fund) привлекол околу 700 милиони долари во март - најмногу од периодот на пандемијата наваму, додека БНО (United States Brent Oil Fund) забележал рекорден прилив од 600 милиони долари.

Експертите оценуваат дека ваквата состојба укажува на длабоко поделен пазар, каде инвеститорите се позиционираат на двете спротивни страни во зависност од нивните очекувања за развојот на конфликтот и глобалната понуда на енергенти.

„Овие приливи одразуваат комбинација од директни обложувања за пад на цената, но и стратегии за хеџирање и арбитража“, велат пазарните аналитичари, додавајќи дека ваквите појави се вообичаени во периоди на зголемена нестабилност.

Во ваков амбиент, исходот останува неизвесен, а движењето на цената на нафтата ќе зависи пред сè од геополитичките случувања и брзината на обновување на глобалните синџири на снабдување.