Израел повторно го отвора најголемото гасно поле по едномесечно затворање

Најголемото израелско гасно поле повторно го започна производството по 33-дневниот прекин предизвикан од војната со Иран, што најверојатно ќе донесе олеснување за пазарите кои се соочуваат со проблеми со снабдувањето.

Проектот Левијатан сега може да продолжи со снабдување и за домашниот пазар и за извоз, изјави за Блумберг портпаролот на акционерот „Њумед енерџи“ (Newmed Energy LP), еден ден откако израелското Министерство за енергетика соопшти дека рестартирањето е неизбежно. Левијатан е масивно гасно поле во источниот Медитеран со кое управува „Шеврон“ (Chevron Corp.) и кое е клучно не само за домашните потреби на Израел, туку и за Египет.

Израел нареди привремено затворање на некои гасни полиња како безбедносна мерка откако конфликтот избувна на 28 февруари. Тоа придонесе за криза на глобалниот пазар, бидејќи војната го наруши поморскиот сообраќај низ Ормускиот теснец, а ракетните напади ја оштетија најголемата светска постројка за течен природен гас во Катар.

Како одговор на тоа, Египет најави низа мерки за рационализација на енергијата поради наглиот пораст на трошоците. Земјата обично прима околу една милијарда кубни стапки природен гас дневно (околу 28 милиони кубни метри) преку гасовод од Израел, а прекинот на снабдувањето претходно го натера Каиро на забрзано зголемување на увозот на течен природен гас.

Враќањето на Левијатан се случува во услови на низа напади низ Блискиот Исток. Неколку часа откако американскиот претседател Доналд Трамп упати нови закани кон иранската инфраструктура за да изврши притисок врз Техеран за мировни преговори, Исламската Република започна нови напади што предизвикаа пожар во нафтена рафинерија и оштетија капацитети за производство на електрична енергија и за десалинизација на вода во Кувајт. Голема постројка за преработка на гас во Абу Даби исто така го прекина работењето откако остатоци од пресретнати проектили предизвикаа пожар.

„Њумед“ во петокот во соопштение наведе дека првичните проценки укажуваат дека едномесечниот прекин на Левијатан нема да има значително влијание врз очекуваниот паричен тек во 2026 година. Партнерите во проектот имаат намера „да ја испитаат можноста за добивање отштета од државата во врска со прекинот на производството на гас“.

Акциите на „Њумед“ во Тел Авив во петокот пораснаа за дури 1,6 отсто. Компанијата поседува околу 45 отсто удел во Левијатан, додека „Шеврон“ има нешто помалку од 40 отсто, а „Рацио енерџис“ (Ratio Energies) го има остатокот.

На другото израелско гасно поле, Кариш, со кое управува „Енерџиан“ (Energean Plc), владата исто така нареди затворање по избувнувањето на војната. Операциите на тоа поле сè уште не се обновени.