Санкциониран танкер ја тестира американската блокада на Ормускиот Тесенц

Танкер санкциониран од САД и поврзан со Кина испловува од Ормускиот Теснец кон Оманскиот залив, тестирајќи ја поморската блокада на претседателот Доналд Трамп. „Рич Стери“, танкер со среден дострел, претходно познат како „Фул стар“, беше ставен на црната листа од Вашингтон во 2023 година за помагање на Техеран да ги избегне енергетските санкции.

Засега не е јасно дали овој пат ги посетил иранските пристаништа пред транзитот или носи товар. Ова е втор обид за превозникот, кој првиот го започна кога блокадата на САД стапи во сила во понеделникот, но се врати назад. Потоа повторно тргна неколку часа подоцна и во вторник изгледаше дека навлегува во источната страна на Ормуз.

Bloomberg Mercury

Сопствениците на бродови, трговците со енергија и инвеститорите на финансиските пазари внимателно ја следат неговата рута низ Ормуз додека се обидуваат да разберат како ќе функционира најновиот напор на САД да го притисне Техеран и да ги ограничи неговите нафтени приходи.

„Вистинското прашање не е само дали бродовите можат да минат низ Ормуз, туку каков спектар на опции за спроведување ќе применат американските воени бродови и каде ќе одлучат да ги применат,“ рече Чарли Браун, советник во „Обединети против нуклеарен Иран“ (United Against Nuclear Iran), американска лоби група фокусирана на Техеран.

„Рич Стери“ првично објави дека има кинески сопственик и екипаж - вообичаен механизам за безбедност за бродови што го минуваат теснецот за време на сегашниот конфликт во Персискиот залив.  Истовремено  на овој начин може да се тестира и решителноста на Вашингтон да предизвика пловила поврзани со најголемиот светски увозник на нафта.

Танкерот сега означува дека неговата дестинација е оманското пристаниште Сохар, според податоците за следење на бродови. За време на преминот, сигналите за локација на танкерот не беа конзистентни.

Пловилата во областа редовно наидуваат на електронски пречки што можат да создадат неточни извештаи за брзина и локација.

Друг танкер, „Елпис“, беше во теснецот и се упатуваше кон Оманскиот залив токму кога започна блокадата. Изгледа дека застана надвор од тесниот воден пат и крај иранскиот брег.

Платформите за следење на бродови „Кплер“ и „Вортекс“ покажуваат дека „Елпис“ бил закотвен во иранско пристаниште во заливот пред да се обиде да мине низ Ормуз, што значи дека би бил потенцијална цел за американски воен брод во патрола. Бродот беше санкциониран од САД минатата година под неговото поранешно име „Чамтанг“, поради врските со иранската трговија со нафта.

Повеќето сопственици на бродови до кои стигна „Блумберг“ низ Блискиот Исток и Азија - кои сега мора да добијат одобрение и од Иран и од САД за да излезат од Персискиот залив - рекоа дека ќе паузираат со обидите да го минат теснецот додека не стане јасно како функционира блокадата.

Блокадата на Трамп предизвика и загриженост кај азиските земји што силно зависат од енергија и гориво од Блискиот Исток. Кинескиот министер за надворешни работи Ванг Ји ги повика глобалните чинители да поттикнат мировни разговори меѓу Техеран и Вашингтон.

Портпарол на кинеското Министерство за надворешни работи на редовен брифинг во вторникот рече дека не е запознаен со деталите од патувањето на „Рич Стери“.

„Само со завршување на војната и постигнување мир и стабилност во регионот на Заливот може суштински да се обезбеди безбеден и непречен премин низ Ормускиот Теснец,“ рече портпаролот Гуо Џиакун.

Секој обид да се пресретне кинеско пловило би ги вознемирил пазарите што веќе се потресени од историска криза во снабдувањето со енергија.

„Во најдобар случај, најавата на Трамп е хартиен тигар. Во најлош, тоа претставува ескалација,“ рече Карлос Касановa, виш азиски економист во „Јунион Бенкер Приве“ (Union Bancaire Privee) во Хонг Конг.

„Рич Стери“ означен е дека плови под знаме на Малави, но оваа африканска држава без излез на море објави дека нема официјален регистар за океански бродови.

Бродот  во сопственост на „Фул стар шипинг“ ги има истите контакт детали како „Шангај Ксуанран“, покажува поморската база на податоци „Еквасис“. Компанијата не одговори на испратено барање за коментар по електронска пошта.

Шангајската компанија е исто така санкционирана од Стејт департментот. Сопственик на „Елпис“ е „Чартхемикал“, која ги користи контакт деталите на својот менаџер ИМС од каде не одговорија на испратеното барање за коментар по електронска пошта.