ОПЕК+ демонстрира стабилност со скромно зголемување на производството

Главните членки на ОПЕК+ се согласија на скромно и симболично зголемување на производствените квоти за јуни, во обид да испратат порака за стабилност по неочекуваното повлекување на Обединетите Арапски Емирати (ОАЕ). Во исто време, Абу Даби ги истакна сопствените планови за проширување на производството.

Седум земји предводени од Саудиска Арабија и Русија ќе додадат 188.000 барели дневно следниот месец според договорот што беше финализиран на видео-конференција во неделата, соопшти ОПЕК. Малото зголемување беше очекувано и пред излегувањето на Емиратите, а реалната примена на дополнителните барели ќе зависи од повторното отворање на Ормускиот теснец и обновување на извозот од Персискиот Залив.

Во исто време, ОАЕ повторно ги истакнаа своите амбиции за зголемување на производството. Државната нафтена компанија „Аднок“ (Adnoc) најави забрзување на инвестицискиот план вреден 200 милијарди дирхами (околу 55 милијарди долари), кој опфаќа проекти во истражување, производство и рафинирање. Ова е дел од поширока, претходно најавена програма.

Повлекувањето на Емиратите, кое изненади дел од останатите членки на Организацијата на земјите извознички на нафта и нејзините партнери, дополнително ја намалува способноста на групата да влијае врз цените на нафтата, кои веќе беа под притисок поради зголеменото производство од конкуренти како американскиот нафтен сектор. Во соопштението на ОПЕК не се споменуваат ОАЕ.

ОПЕК+ формално продолжува со процесот на враќање на претходно намаленото производство, кој беше започнат пред избувнувањето на војната. Групата се прилагодува и на изненадувачкото напуштање на Емиратите, кои на 28 април најавија излез, а на 1 мај и формално ја напуштија организацијата.

„ОПЕК+ се однесува смирено“, изјави Хорхе Леон од „Ристад Енерџи“ (Rystad Energy),  поранешен аналитичар во секретаријатот на ОПЕК. „Со тоа што ја следи истата патека на производство - само без ОАЕ - групата се однесува како ништо да не се случило, намерно намалувајќи ги внатрешните поделби и прикажувајќи стабилност.“

Ова зголемување има главно симболичен карактер, бидејќи повеќето членки од Блискиот Исток нема да можат да го спроведат без повторно отворање на Ормускиот теснец, кој е под влијание на конфликтот меѓу САД и Израел со Иран. Без нормализирање на извозот од Персискиот Залив, реалното зголемување на понудата останува ограничено.

Повлекувањето на ОАЕ е резултат на повеќегодишни тензии со Саудиска Арабија околу нафтената политика и регионалното влијание. Абу Даби наведува дека војната со Иран создава услови за излез од ОПЕК без значително нарушување на пазарите.

Иако заминувањето нема веднаш да влијае врз глобалната понуда на нафта, ОАЕ сега ќе можат побрзо да го зголемат производството по повторно отворање на Ормуз, без ограничувања од квотите на ОПЕК, што потенцијално отвора простор за идни ценовни конфликти на пазарот.