Иранската нафта сѐ подолго останува на море, големите купувачи се повлекуваат

Големи количества иранска нафта се натрупуваат на море, додека Исламската Република се соочува со тешкотии да најде купувачи пред истекот на 60-дневниот рок што го одобри Вашингтон.

Повеќе од 58 милиони барели иранска сурова нафта и кондензат се наоѓале на танкери заклучно со 1 јули, според податоците на „Вортекса“ (Vortexa) и пресметките на „Блумберг“. Кај повеќе од 90 отсто од танкерите нема јасна крајна дестинација. Како пријавена дестинација најчесто стои „по наредба“ или Сингапур, што укажува дека е можно претоварот на нафтата да се изврши од еден на друг брод во Малаканскиот Теснец.

Доколку суровата нафта не биде брзо продадена, Техеран ќе остане без многу потребни приходи, а тоа би можело да ја ослабне неговата позиција во преговорите со Вашингтон. Исламската Република има рок до средината на август да најде купувачи, откако САД во средината на јуни ги укинаа санкциите за иранската нафта и ја прекинаа блокадата на иранските пристаништа, како дел од привремениот мировен договор.

Танкерите со иранска сурова нафта забрзано ги напуштаат пристаништата

Големината на круговите е пропорционална на проценетиот обем

Извор: Забелешка: Податоците се заклучно со 1 јули. Кога како дестинација е наведено „по наредба“ или Сингапур – во близина на Малаканскиот Теснец, каде што обично чекаат бродовите со непродадена нафта – танкерот се класифицира како брод без јасна дестинација/Bloomberg, Vortexa

Побарувачката од кинеските независни рафинерии – главните купувачи на иранската нафта пред конфликтот – останува слаба, бидејќи искористеноста на нивните капацитети падна на најниско ниво во последните девет години. И кинеските државни рафинерии остануваат настрана, повикувајќи се на загриженост околу можноста банките да ги финансираат таквите зделки.

Најголемиот дел од нафтата се наоѓа во и околу Персискиот Залив, во Индискиот Океан или во Малаканскиот Теснец во близина на Сингапур.

Иран во средата соопшти дека извезол повеќе од 40 милиони барели нафта откако САД ја укинаа поморската блокада. Но, повеќе од 20 милиони барели иранска сурова нафта стојат неангажирани во азиските води седум или повеќе денови, што е зголемување од речиси 18 отсто во споредба со претходната недела, наведува „Кплер“ (Kpler Ltd.).

Техеран се соочува со повеќе пречки во обидот да ја продаде нафтата. Ограничувањата на Европската Унија и Обединетото Кралство и натаму се во сила, што го отежнува осигурувањето, додека дел од пристаништата би можеле да избегнуваат да ги примаат бродовите од таканаречената „темна флота“ што Иран ја користи за превоз на суровата нафта. Постои и ризик испораките да останат заглавени среде зделка доколку американскиот претседател Доналд Трамп реши предвреме да го прекине рокот.

Купувачите и натаму се претпазливи поради можноста Вашингтон повторно да воведе санкции ако пропаднат преговорите, изјави американскиот министер за финансии Скот Бесент за „Фокс њуз“. „Никој освен Кина, која ја купуваше и додека беше под санкции, не ја купува, па затоа и натаму се тргува со попуст.“

Другата голема пречка за Иран да ја пласира суровата нафта е слабата побарувачка на клучните азиски пазари, каде што има мал интерес и покрај напорите на Техеран да привлече купувачи. Регионот е добро снабден, и со нафта од Персискиот Залив што не е од Иран и која сега повторно може да минува низ Ормутскиот Теснец, како и со сурова нафта од други делови на светот набавена за време на војната.

Увозот на иранска сурова нафта во Кина во јуни се преполовил на околу 654.000 барели дневно во однос на претходниот месец, според „Кплер“. Сепак, најмалку еден танкер во изминатата недела истоварил товар со иранска нафта во Кина, според податоците на „Кплер“ и „Вортекса“.

Индискиот министер за нафта Хардип Пури минатата недела се сретна со својот ирански колега во Њу Делхи, но не презеде обврска за обновување на увозот.

Државните преработувачи во Индија засега ја избегнуваат иранската нафта, бидејќи веќе обезбедиле доволно сурова нафта најмалку до крајот на август, велат лица запознаени со ситуацијата, кои побарале да останат анонимни бидејќи разговорите не се јавни. Тие додаваат дека Индија сè уште очекува дополнителни појаснувања од Вашингтон во врска со плаќањата во американски долари.

Индија би можела повторно да почне да купува иранска нафта откако ќе се разјаснат каналите за плаќање, додека целосното укинување на санкциите би им овозможило на рафинериите долгорочно повторно да набавуваат нафта од Иран, велат истите извори.

Сепак, интересот во Азија за иранската нафта би можел брзо да оживее ако цената биде доволно ниска. Рафинериите што веќе обезбедиле сурова нафта можат да препродадат дел од резервите за да ослободат простор доколку иранските испораки се нудат со голем попуст, а постои и можност да ја зголемат искористеноста на капацитетите ако суровината биде доволно евтина.