„Голдман сакс“ предупредува - Брент над 120 долари ако продолжат нарушувањата во Ормуз

Цената на нафтата Брент би можела да надмине 120 долари за барел до четвртиот квартал доколку продолжат нарушувањата во Ормуз, оценува „Голдман сакс груп“ (Goldman Sachs Group Inc.), иако тоа не е основното сценарио на банката.

„Ескалацијата на Блискиот Исток и намалувањето на проценетите испораки од Персискиот Залив на помалку од 45 отсто од нивото пред војната повторно ги зголемија цените на нафтата“, наведуваат аналитичарите предводени од Дан Страјвен во белешка од 20 јули.

Во моментов, „Голдман сакс“ очекува цената на Брент во четвртиот квартал да изнесува 80 долари за барел, а следната година 75 долари, под претпоставка дека тензиите на Блискиот Исток ќе се намалат. Сепак, аналитичарите предупредуваат дека ризиците за овие прогнози се насочени кон повисоки цени поради нарушувањата во поморскиот сообраќај низ Ормуз, како и можните проблеми во Црвеното Море.

Глобалните енергетски пазари овој месец беа силно погодени, при што цената на Брент повторно се искачи над 91 долар за барел, по обновените судири меѓу САД и Иран, како и по заканата на јеменските бунтовници Хути, поддржани од Техеран, дека ќе ги блокираат испораките од Саудиска Арабија. Испораките преку Црвеното Море беа клучни за нарушените испораки на сурова нафта од Персискиот Залив да стигнат до купувачите.

Иако помалите глобални залихи во вториот квартал го направија пазарот на нафта почувствителен на прекини во снабдувањето, падот на кинескиот увоз, заедно со поголемата флексибилност на побарувачката, би можеле да го ограничат очекуваниот раст на цените, оценуваат аналитичарите.

За инвеститорите што сакаат да се заштитат од долготрајни геополитички потреси на Блискиот Исток, како и од Русија, „Голдман сакс“ препорачува стратегија за заземање долга позиција во распонот на цените на европскиот дизел меѓу договорите за декември 2026 и март 2027 година.

Според аналитичарите, пазарот на дизел бил многу затегнат уште пред почетокот на војната, Украина продолжува да ги напаѓа руските рафинерии, а дополнителен ризик за снабдувањето претставуваат ураганите, екстремните летни горештини и одложувањето на редовното одржување на постројките.

Последната цена на Брент изнесуваше 88,40 долари за барел, што е околу 45 отсто повеќе од почетокот на годината. Цената достигна врв од над 126 долари за барел кон крајот на април, во почетната фаза од конфликтот меѓу САД и Иран.

Со оглед дека сообраќајот низ Ормускиот Теснец сега речиси целосно запре, заканата од Хутите за испораките на сурова нафта значи дека извозната рута на Саудиска Арабија преку Црвеното Море „сега директно е на удар“, се наведува во белешка на „Ристад енерџи“ (Rystad Energy AS).

„Доколку не дојде до прекин на огнот, Ормускиот Теснец остане во голема мера затворен, а заканите на Хутите за бродскиот сообраќај во Црвеното Море се засилат, ризикот од значителен нов раст на цените на нафтата ќе биде многу голем“, изјави Хорхе Леон, директор за геополитички анализи во „Ристад енерџи“.