Се очекува повисок пораст на цената на нафтата

Кај цената на нафтата изразена во евра, извршена е нагорна ревизија на оцените за 2022 година, при што се очекува повисок раст од проектираниот во април, соопшти Народната банка во новиот извештај за макроекономските показатели. 

„Тоа во најголема мера е резултат на загриженоста на инвеститорите околу снабдување со нафта од страна на Русија, како и очекувањата за понатамошно намалување на производството на нафта од страна на земјите од ОПЕК+ почнувајќи од октомври оваа година“, информираат од Народната банка.

Од друга страна, за 2023 година се очекува ист пад на цената на нафтата како и во април.

Во однос на цените на металите, ревизиите се надолни, како резултат на загриженоста на инвеститорите околу идниот глобален раст.

„Имено, во моментов се очекува значително помал раст на цените на бакарот и никелот во 2022 година во однос на проекцијата од април, како и пад, наместо минимален раст на цената на никелот, а поголем пад кај цената на бакарот во 2023 година“, соопшти Народната банка.

Оцените за растот на цените на пченката и пченицата изразени во евра за 2022 година се ревидирани во различна насока во споредба со април.

„Така, во 2022 година се очекува помал раст на пченицата, во најголема мера заради овозможеното снабдување од Украина , очекувањата за зголемена понуда од страна на Русија, но и загриженост околу глобалниот раст. Од друга страна, се очекува поголем раст на цената на пченката, што се должи на оцените за поголема апрецијација на САД-доларот во однос на еврото. За 2023 година, кај двата производи се очекува пад, но помал од предвидениот во април“, информираат од НБМ. 

Во моментов нема коментари за веста. Биди прв да коментира...

Остави коментар