.webp){kind=icon}
Израел соопшти дека постигнале историски договор со Либан, со посредство на САД, откако двете страни го одобрија најновиот нацрт договор за решавање на морскиот граничен простор во делот на Средоземното море, предел богат со природен гас.
Договорот меѓу двете држави може да го зголеми производството на гас, вклучувајќи и раст на израелскиот извоз во Европа, каде што очајнички се бараат поголеми количини за снабдување откако Русија ја прекина испораката. Израелскиот премиер рече дека договорот ќе вбризга милијарди во израелската економија, додека од кабинетот на либанскиот претседател наведоа дека ги чуваат правата на своето природно богатство.
Договорот предвидува Израел да може да почне да вади природен гас од Кариш, без закани за напад од Хезболах, либанската милитантска група, која е спонзорирана од Иран. Исто така се гарантира дека Либан може да почне да го истражува полето Кана и да плати за акции за бушење на израелска територија преку конзорциумот што го предводи „TotalEnergies SE“.
Либанскиот министер за енергетика рече дека во вторник ќе се состане со претставниците на „TotalEnergies“. Од друга страна, одредени министри од израелскиот безбедносен кабинет ќе се состанат во текот на денов за да разговараат за договорот, после што ќе следи посебен состанок на владата, соопштија од кабинетот на израелскиот премиер.
Израел извести и дека производството на гас од Кариш во источниот Медитеран ќе овозможи да се зголеми извозот, вклучително и за Европа. Цената на гасот годинава порасна поради војната во Украина. „Energean Plc“, компанијата која што ќе управува со Кариш планира да почне со производство во наредните неколку недели, изјави портпаролот на компанијата, која што котира на Лондонската берза.
Овој договор беше една од клучните цели за САД на Блискот исток. Амос Хохштајн, виш претставник на претседателот Џо Бајден за енергетска безбедност, патуваше неколку пати во Либан и Израел за да ги убеди земјите да се договорат за ова прашање.
Разговорите малку ги искомплицира фактот што Либан официјално не го признава Израел. Доаѓањето на производниот платформски брод на Кариш во јуни ги разлути голем дел од либанските политичари и Хезболах. Неколку недели подоцна, Израел соопшти дека пресретнале три непријателски дронови од Либан, кои летале во правец на платформата.
