.webp){kind=icon}
Нафтата се движи кон неделна загуба бидејќи знаците за глобално економско забавување и заострената монетарна политика се закануваат да ја намалат потрошувачката на енергија.
Фјучерсите на West Texas Intermediate скокнаа над 89 долари за барел, но сепак се во минус за повеќе од три отсто оваа недела. Вжештените податоци за инфлацијата во САД објавени во четвртокот ги поттикнаа очекувањата дека американската централна банка повторно значително ќе ги зголеми каматните стапки на двата преостанати состанока во 2022 година, забавувајќи го растот.
Суровата нафта, исто така има проблеми бидејќи побарувачката во Кина, најголемиот увозник, останува пригушена додека владата ја продолжува својата остра политика на „нулта ковид“. Случаи на зараза имаше и оваа недела, вклучително и во Шангај, пред критичниот конгрес на Комунистичката партија кој се одржува двапати во десет години, а чие најново заседание се отвора овој викенд.
Bloomberg
Нафтата закрепна од септемвриските минимуми минатата недела откако ОПЕК+, вклучително и Русија, се согласија да го намалат производството, но тој прогрес на цената е делумно поништен од понеделникот. Меѓународната агенција за енергија предупреди дека намалувањето на понудата од групата може да доведе до скок на цените, што би можело да ја фрли глобалната економија во рецесија.
Одлуката на ОПЕК+ да го намали производството ја налути администрацијата на Бајден, а официјални лица ја критикуваа улогата на Саудиска Арабија, велејќи дека овој потег ќе помогне да се задржи приходот на Москва со цел да ја финансира нејзината инвазија на Украина. Претседателот Џо Бајден, кој претходно оваа година нареди ослободување од стратешките нафтени резерви, рече дека следната недела ќе објави нови активности за борба против високите цени на горивата во САД.
„Краткорочно, макро сликата и потенцијална акција на САД, натамошната објава за SPR, во обид да се спротивстави на намалувањето на понудата на ОПЕК+ може да изврши дополнителен притисок врз цените“, вели Ворен Патерсон, шеф за стратегијата за стоки во ИНГ (ING Groep NV). „Меѓутоа, на среден до долг рок, пазарот изгледа сè позатегнат, што сугерира дека цените треба да растат“, додава тој.
Цени:
WTI за испорака во ноември порасна за 0,3 отсто до 89,38 долари за барел на Њујоршката берза во 6:46 часот во Лондон.
Брент за декемвриско порамнување беше на ценовно ниво повисоко за 0,2 отсто, на 94,79 долари за барел на ICE Futures Europe берзата.
Широко гледаните временски распони се намалија во последниве недели, што укажува на олеснување на краткорочната пазарна тензија. Распонот на брент, разликата меѓу двата најблиски договора, беше 1,66 долари за барел во споредба со 2,03 долари минатиот петок и 2,82 долари пред две недели.
