Неизвесно европското ембарго за руската нафта

Германскиот министер за економија Роберт Хабек изрази загриженост поради неединството на Европската унија пред самитот на кој ќе се разговара за руското ембарго за нафта и планот за ставање крај на зависноста од руската енергија. Тој ја повика Германија на денешниот самит да настапи единствено, а истото го побара и од земјите-членки на ЕУ.

„Европа е се уште огромна економска област со неверојатна економска моќ. Кога е обединета, може да ја искористи таа моќ“, рече Хабек.

Лидерите на ЕУ ќе се состанат денеска и утре за да разговараат за новиот пакет санкции против Русија, што предвидува ембарго на руската нафта и програма насочена кон забрзување на прекинот на зависноста од фосилните горива, вклучително и од рускиот гас. Но, за овој пакет санкции во ЕУ нема единство, најмногу се противи Унгарија која бара да биде изземена од оваа одлука.

„Потребно е јавно да донесеме одлука. Имаше разговори во неделата попладне и ќе ги има утрово, како и во текот на денот“, изјави еврокомесарот за надворешна политика Жозеп Борел.

Тој смета дека попладнево ќе им биде понуден договор на шефовите на земјите-членки на ЕУ.