Блок 1 на РЕК Битола е саниран и повторно започна со работа

„Блок 1 во РЕК Битола од изутрината, во 8:35 часот, е вратен на мрежата и продолжи со производство на електрична енергија, по извршената санација во изминатите два дена“, соопшти ЕЛЕМ.

Санирањето на пречките во делот на кондензаторот и на дел од цевководниот систем во постројката се изведе 24 часа порано од предвидениот рок и блокот е вклучен во редовно производство.

„Стручните служби и вработените во РЕК Битола што беа вклучени во зафатот покажаа исклучителна посветеност и непрестана работа на задачата, со цел и покрај амортизираната опрема и долгиот рок на работа на термоцентралата, за што пократко време да се отстрани застојот и блокот да се врати на мрежата“, се наведува во соопштението.

РЕК Битола е во очекување да пристигне и трансформаторот за Блок 3, кој во моментот се превезува од Грција кон граничниот премин Меџитлија.

Од една страна, производствените погони се враќаат во функција, но, од друга страна, премиерот Димитар Ковачевски веќе неколкупати повтори дека е недозволиво да се произведува струја што е поскапа од увезената, зашто, според пресметките, во моментов струјата на меѓународниот пазар е поисплатлива отколку да се произведе дома.

АД ЕСМ информира дека во изминатото деноноќие произвеле 6.519 мегават-часа електрична енергија, а набавиле 3.160 мегават-часа.

Во моментов нема коментари за веста. Биди прв да коментира...

Остави коментар