Цените на европскиот природен гас пораснаа како последица на ниските температури во регионот, што ја зголемува побарувачката и го тестира чувствителниот енергетски систем.
Референтните фјучерси денеска пораснаа дури за 4,9 отсто. Ладното време во Северозападна Европа врши притисок на резервите што се направени за зима. Сепак, резервите и натаму се пополни од нормалното и складиштата се исполнети до 91 отсто. Тоа заедно со големите резерви на течен природен гас помага во одржувањето на цената на гасот под контрола.
Во прогнозите за следните две недели доминира арктичко време, со температури под нулата во Обединетото Кралство и нордиските земји, велат прогнозерите од „Максар“ (Maxar Technologies Inc). Само одредени делови од Јужна Европа ќе бидат поштедени од ладното време.
„Со оглед на прогнозите за температури пониски од нормалните, цената на гасот веројатно ќе остане висока во следните недели“, вели Оле Хансен, раководител за стоковни стратегии во Саксо банк (Saxo Bank A/S).
Холандските термински договори, кои претставуваат европско мерило, го заклучија овој ден на тргување на ниво за 2,8 проценти повисоко и се тргуваа по цена од 138,49 евра за мегават-час. Еквивалентните договори во Обединетото Кралство пораснаа за 3,3 отсто. Германските, пак, пораснаа за 6,9 проценти.
Количествата на течен природен гас што се складирани во увозните терминали на Северозападна Европа во локалните мрежи достигнаа рекордно ниво на крајот од ноември и останаа високи, покажуваат податоците на „Блумберг“. Но пазарот и натаму е тесен без нормалните текови од Русија, а ризиците остануваат ако дојде до долготрајно студено време, до понатамошно нарушување на испораките или нагло зголемување на азиската побарувачка.
„Европа веројатно ќе ги издржи оваа и следната зима. Чувството е дека ќе се снајдеме“, рече претседателот на „Енги“ (Engie SA), Жан Пјер Клемед.
Сепак, многу аналитичари на оваа индустрија очекуваат дека резервите ќе станат уште помали во 2023 година, а ЈП Морган (JPMorgan Chase & Co) очекува дека европските цени во просек ќе изнесуваат околу 155 евра, најмногу до 175 евра во третото тримесечје следната година. Во меѓувреме, земјите од Европската Унија, кои се тркаат за тоа кој ќе смисли подобри алатки за да спречи натамошен скок на цените, уште се далеку една од друга во однос на деталите на само една недела пред состанокот на министрите што треба да расправаат токму за тоа.
.webp){kind=icon}
