.webp){kind=icon}
Три месеци по начелниот договор, се враќа во живот идејата за увоз на струја од Бугарија. Според претседателот на Македонско-бугарската стопанска комора, Кирил Лазаров, договорот за електрична енергија со Бугарија се финализира и се очекува во најскоро време да се реализира.
Тој вели дека има сериозни индиции за реализацијата, договор со кој треба да има постојан проток на 200 мегавати електрична енергија од Бугарија. Проблемот што тој досега не е финализиран, како што посочи, е кај нас, бидејќи нашите транформатори не можеле да издржат.
„Договорот за испорака на 200 мегавати постојан проток електрична енергија од Бугарија се финализира и во текот на најголемата потреба имаме сериозни индиции дека ќе се реализира. Проблемот е кај нас бидејќи нашите трансформатори не можат да издржат и затоа се купува транформатор за РЕК Битола“, изјави Лазаров, пренесе МИА.
Преговорите за бугарска струја за македонското стопанство почнаа во септември кога на средба во Софија, македонскиот и бугарскиот премиер договорија дека земјава заклучно со 31 март ќе обезбеди по 200 мегавати на час за домашните компании.
Но, преговорите за деталите потоа запнаа – прво кај цената, а потоа и кај транспортот на струјата.
„Блумберг Адрија“ уште тогаш пишуваше дека за да стигне бугарската струја во земјава ќе се бараат алетрантивни патишта.
Директорот на македонскиот електропреносен систем, МЕПСО, Орхан Муртезани, тогаш ни рече дека има мал проблем, но дека тој ќе биде решен навреме.
„Имаме капацитет да ја пренесеме струјата, но тој не е доволен. Ќе треба да ја надоградиме инфраструктурата и затоа преговараме, затоа е формирана работна група, за да се надминат проблемите“, вели Муртезани.
Претседателот на Стопанската комора, Бранко Азески, пак тогаш навести дека е можно струјата во земјава да доаѓа преку Грција.
„Се работи за базна струја која нема можност да се пренесе тука, ќе треба да се користи грчкиот преносен систем или друго место, ќе се преговара“, рече Азески.
Првиот човек на македонско – бугарската комора, Лазаров, сега најавува дека од Нова година преку интерконекторот во Жидилово земјава ќе добива и 30 проценти повеќе гас од капацитетот што во моментот го нуди руски „Газпром“.
„За гасната врска меѓу Ќустендил и Скопје преку која се пренесува руски гас и која 100 проценти е закупена од „Газпром“ во наредните 20 години, изнајден е начин како да се пуштат околу 30 проценти гас повеќе од рускиот капацитет што е закупен преку зголемување на притисокот во таа цевка. Со тоа зголемување на притисокот, ќе се овозможи поголем проток на гас без да се засегнат руските интереси“, вели Лазаров.
