.webp){kind=icon}
Турција ја зголеми процената за своите резерви на природен гас во Црно Море речиси за една третина, благодарение на работите за процена на состојбата на неколку наоѓалишта, изјави во понеделникот претседателот Реџеп Таип Ердоган.
Турција сега предвидува дека нејзините крајбрежни полиња содржат околу 710 милијарди кубни метри гас, што е значителен поттик, бидејќи земјата се обидува да ги диверзифицира изворите и да стане помалку зависна од увозот што ја покрива речиси целата домашна потрошувачка.
„Зголемените резерви главно му се припишуваат на наоѓалиштето Сакарија, за кое сега се верува дека содржи 652 милијарди кубни метри гас, во споредба со претходно претпоставените 540 милијарди кубни метри“, рече Ердоган во Анкара. „Ревизијата е резултат на проект за евалуација на меѓународна енергетска компанија“, додаде претседателот, без да прецизира која.
Уште 58 милијарди кубни метри гас се пронајдени во друго морско наоѓалиште во близината.
„Ова откритие ќе ја отвори вратата за нови. Ќе започнеме со дупчење на нови локации што е можно поскоро“, рече Ердоган на прес-конференција по состанокот на владата.
Се чини дека резервите на наоѓалиштето Сакарија, кое досега беше најголемо во Црно Море, се многу поголеми од првично претпоставените. Ревизијата, исто така, доаѓа во критично време за Ердоган, кој се соочува со избори за шест месеци. И покрај владините субвенции, сметките за струја и за парно се зголемија во текот на изминатата година, делумно поради руската инвазија на Украина, која започна во февруари.
Bloomberg
Инфлацијата во Турција достигна највисоко ниво во речиси четвртина век, од над 84 отсто, додека цените на енергијата пораснаа уште побрзо. Владата најави четири рунди покачувања на цената на природниот гас годинава, што ги оптоварува буџетите на домаќинствата и доведе до широкораспространето незадоволство.
Полето Сакарија ќе почне да испорачува гас на турската мрежа од првиот квартал на 2023 година. Пред да дознаат за поголемите резерви на гас, официјалните лица очекуваа дека црноморското наоѓалиште ќе задоволи околу една третина од домашните потреби на Турција кога ќе се достигне максималното можно производство.
Според првичниот план за развој, Турција предвиде инаугуративно производство на гас во 2023 година со годишна стапка од околу 3,5 милијарди кубни метри. Целта е тоа да се зголеми на околу 15 милијарди кубни метри годишно во рок од четири години од првичното производство, што е околу една четвртина од тековното производство на Европската Унија.
