Цените на европскиот природен гас се зголемија поради прогнозите за студен бран до крајот на зимата, откако минатата недела го преминаа клучниот праг во закрепнувањето на регионот од неговата енергетска криза.
Фјучерсите се тргуваат за околу 50 евра, откако во петокот паднаа под тоа ниво за првпат во речиси 18 месеци. Регионот е добро снабден, при што тековите од Норвешка се враќаат по неодамнешните прекини и поголемите количества од Русија испорачани преку гасоводите што минуваат низ Украина. Сепак, трговците се претпазливи дека побарувачката за греење може да се зголеми во почетокот на март.
„Се прогнозира постудено време од претходно“, се вели во извештајот на „Максар“ (Maxar Technologies Inc). Засега во делови од Европа има невообичаено топли температури, иако се очекува во текот на неделата посвежото време да се врати во градовите, вклучувајќи ги Лондон и Мадрид.
Bloomberg Mercury
Холандските термински договори, кои се репер во Европа, утрово се тргуваа за три отсто повисоко и мегават-час чини 50,50 евра. Фјучерсите паднаа за околу 35 проценти од почетокот на годината.
Трговците внимателно ги следат сите знаци за поголема потрошувачка на гас во производството на електрична енергија, особено кога брзината на ветерот слабее.
„Цените на гасот сега се на ниво на кое најефикасните електроцентрали можат да се натпреваруваат со најнеефикасните централи на јаглен во блиска иднина, а ние сме блиску до тоа помалку ефикасните гасни централи да станат одржливи“, рече Кристофер Рене, европски аналитичар за гас во ИЦИС (ICIS).
„Сепак, подобрувањето на нуклеарната достапност и силното производство на обновливи извори на енергија треба да ја ограничат можноста за работа на постројките и на јаглен и на гас“, додаде тој.
.webp){kind=icon}