.webp){kind=icon}
Европа успеа да увезе големи количини на дизел во февруари дури и по почетокот на санкциите кон Русија, нејзиниот главен надворешен снабдувач до почетокот на овој месец.
Пристигнувањето на дизел гориво би требало малку да го надмине нивото од јануари, според првите проценки на „Вортекс“. Тоа е главно затоа што руската празнина е пополнета со пратки од Блискиот Исток и Азија.
Всушност, ако сите тековно набљудувани товари за февруари пристигнат пред крајот на месецот, тековите од тие два региона веројатно ќе го достигнат своето највисоко ниво по 2016 година.
Европскиот увоз на дизел овој месец се очекува да биде околу 1,55 милиони барели дневно, што е малку повеќе од јануари, според прелиминарните податоци на „Вортекс“, собрани од „Блумберг“.
Bloomberg
„Недостигот од руска нафта, најверојатно, отвори можност за добавувачите источно од Суецкиот канал“, вели аналитичарката на „Вортекс“, Памела Мунгер. Околу 60 отсто од дизелот кој стигнал во регионот Амстердам-Ротердам-Антверпен (АРА) е увезен од Блискиот Исток и Азија во период од 1 до 18 февруари, рече таа.
Пристигнувањето на руско гориво за овој месец би требало да биде најниско во последните седум години. Тие испораки, кои пристигнаа во Европа неколку дена пред стапувањето на сила на новите санкции на 5 февруари, ќе изнесуваат вкупно околу 282.000 барели дневно, што е далеку под просекот од 683.000 барели дневно во 2021 година, пред руската инвазија на Украина.
Маржите на дизелот во Европа - профитот од рафинирање на горивото од сурова нафта - опаѓаат постојано овој месец поради еластичното снабдување со гориво на континентот и намалената побарувачка поради благата зима.
Од крајот на минатата година, пред воведувањето санкции, Европа го зголеми увозот на дизел. Според „Инсајтс глобал“, залихите на гориво во центарот за складирање AРA се на највисоко ниво во последните две години.
