.webp){kind=icon}
По бавниот почеток на сезоната, извозот на жито од Русија „цвета“ бидејќи купувачите ги бараат нејзините атрактивни резерви. Испораките на пченица во земјата, која е нејзина главна култура, речиси двојно се зголемија во јануари и февруари во однос на претходната година, покажуваат податоците на „Логистик“ (Logistic OS).
Купувачите ги избегнуваа руските практи порано во сезоната, кога цените не беа толку привлечни, но сега се враќаат бидејќи огромната жетва од минатата година му помага на руското жито да се рангира меѓу најевтините на глобално ниво. Неодамнешниот бум покажува дека бродарите надминале некои од проблемите со финансирањето и осигурувањето, поттикнати од санкциите кон Русија.
Изгледите за извозот преку Црното Море доаѓаат во поостар фокус, бидејќи договорот со кој се дозволува украински товари да пловат низ безбеден коридор ќе се обнови за околу две недели. Испораките од двете нации помагаат да се запре влошувањето на глобалната инфлација на храна.
Украина, чиј извоз е далеку помал од минатата сезона, сака да го продолжи договорот за жито за најмалку една година. Русија вели дека може да се продолжи само ако се земат предвид интересите на нејзините земјоделски фирми.
Во моментов има многу побарувачка за руско жито. Нејзините испораки на пченица преку море во јануари и февруари изнесуваа вкупно 6,1 милиони тони, што е за околу 90 проценти повеќе од претходниот период, според расшпредот на бродови од „Логистик“.
Движење на цената на руската пченица / Bloomberg Mercury
Фјучерсите за пченица паднаа на најниско ниво во последната година во Чикаго и Париз, а големите руски количини би можеле да ги ограничат цените до крајот на оваа сезона, наведува „Рабобанк“ (Rabobank). Пазарот генерално очекува договорот што ќе трае до 18 март да биде успешно обновен, велат од банката.
Храната не е вклучена во санкциите кон Москва поради нејзината инвазија врз Украина, но ограничувањата на банките и државните компании ја направија трговијата покомплицирана. Иако стотици илјади тони руско ѓубриво остануваат замрзнати во европските пристаништа, извозниците успеаја да испорачаат огромни количини жито.
Неодамнешниот силен извоз се должи и на зголемената продажба на руската пченица од крајот на минатата година, кога таа култура ја врати својата конкурентска предност, рече Андреј Сизов, директор на консултантската компанија „Совекон“ (SovEcon).
„Почетокот на кампањата беше бавен, земајќи ги предвид големиот род и огромната понуда“, рече Сизов. Русија испорача 29,5 милиони тони пченица досега оваа сезона, во споредба со 26,7 милиони тони една година порано, проценува тој.
Иако обемот на испораки од Украина останува значителен, тие се под врвовите поставени кон крајот на минатата година. Количината испратена преку Црното Море во февруари изнесуваше вкупно 3,35 милиони тони, а бројот на бродови пуштени на проверка, како дел од договорот, паѓа веќе четврти месец.
За забавувањето на својот извоз од крајот на минатата година Киев вината ја гледа во спорот со руските бродски инспектори, кои според договорот, се една од страните задолжени да ги проверат сите бродови што пловат. Вклучувајќи ги и маршрутите како што се патните и железничките, украинските количини за оваа сезона заостануваат зад минатогодишното темпо и тоа за околу една четвртина.
