.webp){kind=icon}
Нафтата ги зголеми добивките откако извештајот од индустријата сигнализираше големо намалување на резервите на сурова нафта во САД, бидејќи тековниот спор го стопира извозот од Турција. Фјучерсите на ВТИ пораснаа по трета сесија по ред, достигнувајќи 74 долари за барел, при што ублажувањето на загриженоста поради банкарската криза дополнително придонесе за нагорно расположение.
Цената на ВТИ за испорака во мај утрово се зголеми за 0,5 отсто, на 73,55 долари за барел, додека нафтата брент се покачи за 0,2 отсто, на 78,78 долари за барел.
Движење на цената на ВТИ и нафтата брент / Bloomberg Mercury
Американскиот институт за нафта објави дека резервите на сурова нафта се намалени за 6,1 милиони барели минатата недела. Тоа е најголем пад оваа година доколку се потврдат владините бројки што ќе бидат објавени подоцна денеска.
САД ги повикуваат Ирак и Турција да го рестартираат извозот од пристаништето Џејхан, откако спорот во кој се вклучија курдските власти ги запре испораките на околу 400.000 барели дневно, затегнувајќи го со тоа пазарот и помагајќи да се зголемат цените. Сепак, ирачката влада рече дека останува на Курдистан да ги помести работите од мртва точка.
Нафтата сè уште е на пат за петта месечна загуба по ред, откако загриженоста за потенцијалната американска рецесија и отпорните руски текови ги притиснаа цените. Организацијата на земји извознички на нафта и нивни сојузници (ОПЕК+) не покажува знаци на приспособување на производството. Нивниот заеднички министерски комитет за следење на состојбите на пазарот ќе се состане следната недела.
„Загриженоста за снабдувањето продолжува да ги поддржува цените на нафтата. Вниманието на пазарот сè повеќе ќе се насочува кон ОПЕК+ и нивниот состанок следната недела“, рече Ворен Патерсон, раководител на стратегија за стоки во ИНГ (ING Groep NV), со седиште во Сингапур.
Резервите на сурова нафта во САД се зголемија во 10 од 11 недели досега оваа година, искачувајќи се на највисоко ниво од мај 2021 година. Аналитичарите анкетирани од „Блумберг“ прогнозираат дека Управата за енергетски информации повторно ќе пријави зголемени резерви во минатата недела за дополнителни 1,75 милион барели.
