Нафтата се задржа блиску до највисокото затворање од јануари, бидејќи трговците ги следат ограничувањата во снабдувањето и извештајот на американската индустрија, што укажа на уште еден пад на резервите од сурова нафта.
Откако вчера цената на ВТИ за испорака во мај се зголеми за 2,2 отсто, утрово порасна само за 0,1 отсто и се тргува по цена од 81,57 долар за барел. За 0,1 отсто се покачи и цената на нафтата брент за испорака во јуни и сега барел чини 85,68 долари.
Движење на цената на ВТИ / Bloomberg Mercury
Според податоците за следење танкери, испораките од Русија ослабеа откако Москва вети дека ќе го намали производството. Во меѓувреме, на Блискиот Исток протокот на гасоводот од полуавтономниот регион Курдистан во Ирак останува запрен.
Американскиот институт за нафта, финансиран од индустријата, објави дека резервите од сурова нафта во Кушинг, Оклахома, се намалиле за 1,4 милион барели минатата недела. Ако тоа се потврди од владините бројки, кои треба да се објават во текот на денов, тоа ќе биде шесто последователно намалување на резервите.
Суровата нафта во март се врати од најниското ниво од последните 15 месеци, откако Организацијата на земји извознички на нафта и нејзините сојузници (ОПЕК+) го намалија производството, паднаа и американските резерви на сурова нафта, а трговците останаа на ставот дека кинеската побарувачка ќе се зголеми. Вчерашната добивка дојде пред податоците за потрошувачките цени во САД, кои ќе ги обликуваат очекувањата на инвеститорите во врска со следниот потег на Федералните резерви (ФЕД).
.webp){kind=icon}
