.webp){kind=icon}
Цената на нафтата порасна четврти пат во вкупно пет сесии на тргување, бидејќи ублажувањето на американската инфлација го ослабна доларот, а дополнително трговците оценуваат дека има прекини во снабдувањето.
По вчерашната загуба од 1,6 отсто, ВТИ за испорака во јуни утрово порасна за 0,8 проценти, на 73,12 долари за барел, додека нафтата брент доби исто толкав процент на вредноста, но таа сега чини точно 77 долари.
Движење на цената на ВТИ и нафтата брент / Bloomberg Mercury
Инфлацијата во САД покажа знаци на ублажување во април, давајќи им простор на Федералните резерви (ФЕД) да ја паузираат својата агресивна кампања за затегнување на монетарната политика. Тоа го поткопува американскиот долар, помагајќи им на стоките чија вредност се пресметува во таа валута.
Резервите на сурова нафта од Канада беа погодени од низа шумски пожари низ Алберта. На Блискиот Исток, Ирак рече дека сè уште чека Турција да го рестартира извозот преку пристаништето Џејхан, бидејќи се одолжува долготрајниот прекин.
Оваа година суровата нафта изгуби околу девет проценти од вредноста бидејќи грижите за затегнувањето на ФЕД и потенцијалната американска рецесија го надминаа неочекуваното намалување на производството од страна на Организацијата на земји извознички на нафта и нејзините сојузници (ОПЕК+), како и очекувањата од американскиот план за повторно полнење на стратегиските резерви.
Подоцна во текот на денешниот ден ОПЕК ќе ги објави своите месечни изгледи, нудејќи увид за тоа како може да се обликува пазарот во втората половина.
„Последните податоци за инфлацијата во Кина покажаа знаци на нерамномерно закрепнување“, рече Равиндра Рао, раководител за истражувања за суровини во „Котак“ (Kotak Securities Ltd), осврнувајќи се на бројките објавени денеска, кои покажаа зголемување на цените на клучниот увозник на сурова нафта со најслабо темпо во последните две години.
Вчерашниот извештај за американскиот пазар на сурова нафта понуди мешана слика за испораките. Комерцијалните резерви на сурова нафта низ целата земја минатата недела се зголемија за речиси три милиони барели, а се проширија и резервите во клучниот центар Кушинг, Оклахома. Сепак, резервите на бензин и дестилати се намалија.
