Нафтата го задржува остриот ноќен раст, поттикнат од знаците дека Кина се префрла на постимулативен начин на дејствување и дека САД планираат да ги обноват резервите.
Вест тексас интермидиејт (ВТИ) се тргува над 69 долари за барел, откако во вторникот порасна за 3,4 отсто, што е најмногу во повеќе од пет недели. Пекинг размислува за широк спектар на стимулативни мерки за заживување на забавеното закрепнување на Кина, откако веќе презеде чекори за олеснување на монетарната политика. Земјата исто така издаде свежа квота за увоз на нафта за недржавните рафинерии и трговци за 2023 година.
Според упатени извори, САД планираат да купат околу 12 милиони барели нафта оваа година за да ги дополнат исцрпените резерви за итни случаи. Слабеењето на инфлацијата исто така придонесува за очекувањата дека Федералните резерви (ФЕД) ќе го запрат зголемувањето на каматните стапки за првпат во последните 15 месеци.
Цената на нафтата е сè уште за околу 17 отсто пониска отколку во средината на април, бидејќи влошените изгледи за побарувачката и отпорноста на извозот од Русија, и покрај ветените намалувања на производството, ги притиснаа цените. Сепак, поповолните сигнали од Кина и САД, како и извештајот на ОПЕК, кој сугерира дека намалувањата на производството во Саудиска Арабија ќе успеат да ја намалат понудата во втората половина од годината, го помагаат сентиментот.
Неодамнешниот пораст на цените во голема мера е „реакција на поддржувачката монетарна политика на Кина“, рече Јип Јун Ронг, пазарен стратег за „ИГ Азија“ (IG Asia Pte) со седиште во Сингапур. „Генерално поволното опкружување и слабеењето на американскиот долар во последните денови не успеаја да генерираат значителна позитивна реакција на цените на нафтата“, што укажува дека побарувачката останува клучен двигател, рече тој.
Bloomberg Chartmaker
Цени:
- ВТИ за испорака во јули беше речиси непроменета, на 69,41 долари за барел, во 12.14 часот во Сингапур.
- Брент за испорака во август поскапе за 0,1 отсто, на 74,36 долари за барел.
Инвеститорите ќе го следат и месечниот извештај на Меѓународната агенција за енергетика, кој се очекува в среда, за увид во состојбата на пазарот.
Американскиот институт за нафта, кој е финансиран од индустријата, објави дека резервите од нафта на САД на национално ниво се зголемиле за еден милион барели минатата недела. Пораснаа и резервите на бензин и дестилат, како и резервите во складиштето во Кушинг, Оклахома. Официјалните податоци се очекуваат в среда.
.webp){kind=icon}
