Цената на нафтата брент падна под 80 долари, се очекува договорот меѓу САД и Иран да ја зголеми понудата

Цената на нафтата брент падна под 80 долари за барел за првпат по повеќе од три месеци, бидејќи договорот меѓу САД и Иран за повторно отворање на Ормускиот Tеснец ги зголеми очекувањата за заживување на понудата, при што водечките банки од Волстрит ги намалија своите ценовни прогнози, а клучните пазарни показатели паднаа.

Глобалниот репер брент падна дури за 4 проценти, на пат кон најдолгиот период на падови оваа година. Привремен договор треба да потпишат двете страни во Швајцарија в петок, иако Вашингтон и Техеран сè уште не го објавиле текстот на нивниот меморандум.

И „Морган Стенли“ (Morgan Stanley) и „Голдман Сакс“ (Goldman Sachs) ги намалија процените за цените во наредните квартали. „Голдман“ сега тргнува од претпоставката дека извозот од Персискиот Залив до крајот на јули ќе ги достигне нивоата пред војната, еден месец порано отколку што претходно се очекуваше.

Претседателот на САД, Доналд Трамп, изјави дека теснецот в петок ќе биде целосно отворен.

„Веќе сега имаме многу пловни коридори. Теснецот ќе биде отворен и преминот низ него нема да се наплаќа“, им рече Трамп на новинарите на самитот на Групата 7 во Франција.

Падот на цените на нафтата на најниското ниво од почетокот на март избриша поголем дел од добивките остварени за време на конфликтот, со што се ублажија инфлаторните притисоци токму во момент кога претставниците на Федералните резерви (Фед) размислуваат за понатамошни потези во врска со каматните стапки.

Сепак, остануваат голем број отворени прашања за тоа како привремениот договор ќе биде спроведен во практика. Пазарот и понатаму е загрижен за безбедноста на пловидбата, правилата за функционирање на рутата, како и за прашањето дали Ормускиот Теснец - низ кој пред војната минуваше околу една петтина од светската понуда на нафта - навистина ќе остане без наплата за транзит.

Недостигот од детали, меѓутоа, ги тера учесниците на пазарот на претпазливост. Енергетските претставници од Персискиот Залив наведоа дека се преплавени со прашања од купувачи што сакаат да знаат дали суровата нафта повторно ќе може непречено да минува низ теснецот, додека бродските компании и трговците истакнуваат дека им е потребна поголема јасност пред да испратат танкери по таа рута.

И покрај тоа, „Морган Стенли“ сега проценува дека цената на брентот во периодот од јули до септември во просек ќе изнесува 90 долари за барел, наместо претходно прогнозираните 100 долари. Прогнозата за четвртиот квартал е намалена за 15 долари, на 80 долари за барел.

„Многу работи допрва треба да бидат договорени и клучните ризици сè уште постојат, но ова е важен чекор кон смирување на конфликтот и зголемување на извозот на нафта преку Ормускиот Теснец“, наведоа аналитичарите предводени од Мартијн Ратс. Тие очекуваат дека до септември ќе закрепнат околу 50 проценти од производството, а до декември 80 проценти, нешто побрзо отколку што претходно проценуваа.

Аналитичарите на „Голдман“, предводени од Даан Стројвен, сега очекуваат брентот во четвртиот квартал во просек да вреди 80 долари за барел, што е за 10 долари помалку од нивната претходна прогноза.

 

Од друга страна, РБЦ (RBC Capital Markets) зазеде попретпазлив став. Аналитичарите предводени од Хелима Крофт сметаат дека ќе бидат потребни месеци за обемот на транспортот да се приближи до нивоата од 27 февруари, односно периодот пред почетокот на војната.

„Можно е рекордните текови низ Ормускиот Теснец веќе да се зад нас“, наведоа тие.

Промените во пазарната динамика се гледаат и преку намалувањето на разликата меѓу двете најблиски термински цени на брентот. Иако пазарот и понатаму е во таканаречена структура на беквардација (backwardation), каде што моменталната цена е повисока од идната, разликата во вторникот изнесуваше само 83 центи по барел. Пред еден месец беше поголема од четири долари.

Дополнителен увид во состојбата на пазарот се очекува в среда, кога Меѓународната агенција за енергија (ИЕА/IEA) ќе го објави својот месечен извештај за изгледите на пазарот на нафта. Агенцијата со седиште во Париз ги советува водечките светски економии во креирањето на енергетската политика и за време на војната го координираше ослободувањето нафта од стратешките резерви на своите членки.

Практичното затворање на Ормускиот Теснец, кој беше изложен на двојна блокада од Иран и САД, го намали протокот на нафта од регионот и доведе до трошење на комерцијалните и стратешките резерви. Американските стратешки резерви на сурова нафта паднаа на најниско ниво од 1983 година, покажуваат податоците објавени во понеделникот.

Со помош на Алекс Лонгли