Расте цената на нафтата по најавите за ограничување на снабдувањето

Цената на нафтата порасна откако Саудиска Арабија соопшти дека ќе го продолжи доброволното намалување на производството за уште еден месец и откако Русија вети дека ќе го намали извозот.

Ријад веќе ја намалува понудата за дополнителни еден милион барели дневно и ќе продолжи со тоа намалување во август, се вели во соопштението на државната саудиска агенција за печат во понеделникот. Набргу потоа, Москва најави намалување на извозот на сурова нафта за 500.000 барели дневно следниот месец.

Овие потези се дел од пошироките напори на големите производители на нафта да ги поддржат цените. Досега оваа година тие имаа мал успех, при што реперот Брент падна за околу 11 проценти бидејќи кинеското закрепнување не е според очекувањата. Трговците стравуваат од потенцијална рецесија во САД, а силниот извоз од Русија и Иран ги зголемуваат резервите.

Денешните најави веројатно ќе предизвикаат шпекулативни позиционирања на пазарот. Минатата недела, хеџ-фондовите и другите менаџери со пари имаа најголем број надолни облози за Вест Тексас (West Texas Intermediate) од 2017 година наваму, според податоците на „ЦФТЦ“ (CFTC).

Покрај затегнувањето на пазарот на сурова нафта, одлуките на Ријад и Москва може да поттикнат техничко купување. Брент го надмина својот 50-дневен просек за прв пат од 22 јуни, ниво што се бореше да го надмине во последните месеци.

Инаку, нафтата од типот Брент за септември поскапе за 0,9 проценти на 76,08 долари за барел утрово во Њујорк, а нафтата од типот ВТИ за испорака во август се зголеми за 1,1 процент до 71,40 долари за барел.

Во моментов нема коментари за веста. Биди прв да коментира...

Остави коментар