Бензинот од утре поевтинува, дизелот останува со иста цена

Од ноќеска на полноќ бензинот ЕУРОСУПЕР БС-95  поевтинува за два денара за литар, а цените на другите горива остануваат исти, одлучи денеска Регулаторната комисија за енергетика и водни услуги (РКЕ). 

Новата малопродажна цена на бензинот од 95 октани ќе изнесува 87 денари, ЕУРОСУПЕР БС – 98 и понатаму ќе се продава за 91, а ЕУРОДИЗЕЛ БС (Д-Е V)  за 85,5 денари за литар. 

Од РКЕ соопштија дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 3,88 отсто, а кај дизелот зголемување за 0,068 отсто. Курсот на денарот во однос на доларот во споредба со претходната пресметка е повисок за 0,258 отсто.

На светските берзи пак, денот почна со највисоки цени на нафтата во последната една година. Брент нафтата во еден момент надмина 97 долари за барел, а во текот на денот се стаблизираше под овој праг. Цената на американската нафта пак надмина 95 долари за барел.

Прогнозите на аналитичарите се дека цената на „црото злато“ во наредниот период ќе се искачи на над 100 долари за барел. Состојбата ја комплицира ниското ниво на резерви во САД. Имено, во складиштата во Кушинг, Оклахома, утрово резервите беа на најниско ниво од јули минатата година. 

На цената на дериватите во земјава влијае и курсот на доларот кој оваа недела ја почна со највисока врендост во последните дваесетина дена. 

Во моментов нема коментари за веста. Биди прв да коментира...

Остави коментар