Цената на нафтата расте поттикната од очекуваниот глобален дефицит

Цената на нафтата на светскиот пазар го започна новиот квартал со мал пораст поради зголемените облози дека глобалната побарувачка ќе ја надмине понудата.

ВТИ (West Texas Intermediate) напредуваше над 91 долар за барел, откако скокна за 29 отсто во третиот квартал, што е најголема добивка во третиот квартал за речиси две децении. Празниците во многу азиско-пацифички земји во понеделникот, вклучувајќи ги и Кина и Индија, може да го ограничат обемот на тргување со ризични средства, вклучувајќи ја и нафтата.

Нафтата порасна од средината на јуни, откако Организацијата на земјите извознички на нафта и нејзините сојузници (ОПЕК+) ги ограничи испораките на сурова нафта, Русија го забрани извозот на дизел, а официјалните податоци на САД потврдија пад на резервите на сурова нафта во резервоарите во Кушинг, Оклахома. Порастот - кој беше поддржан и од силната побарувачка - повторно ги разгоре шпекулациите дека цената на нафтата може да достигне 100 долари за барел.

„Последниот бран на силен нагорен импулс поради загриженоста за снабдување беше исцрпен до крајот на минатата недела“, рече Вандана Хари, основачка на аналитичката фирма „Ванда инсајтс“ со седиште во Сингапур. „Нафтата најверојатно ќе влезе во фаза на консолидација во очекување на дополнителните сигнали“, додаде таа.

Bloomberg Chartmaker

Овонеделниот самит „Адипек“ (Adipec 2023) во Абу Даби, најголемата енергетска конференција на Блискиот Исток, може да понуди нови сознанија за тоа што да очекуваме на пазарот на сурова нафта во овој квартал. Меѓу планираните говорници се министерот за енергија на ОАЕ, Сухаил ал Мазруеи, и генералниот секретар на ОПЕК, Хајтам ал-Гаис.

Цени:

- ВТИ за испорака во ноември се зголеми за 0,4 отсто, на 91,19 долари за барел, во 11.27 часот во Сингапур.

- Брент за декемвриско порамнување додаде 0,4 отсто на 92,55 долари за барел.

Во моментов нема коментари за веста. Биди прв да коментира...

Остави коментар