.webp){kind=icon}
Прогнозерите на Волстрит гледаат одреден простор за закрепнување на цените на нафтата следната година, иако тоа можеби не би бил значителен пораст.
Проекциите за глобалниот репер Брент во 2024 година од пет големи банки во просек се околу 85 долари за барел, во споредба со сегашните нивоа од 77 долари. Најниска проценка има „Ситигруп“ (Citigroup Inc.), од 75 долари за барел, а „Голдман Сакс“ (Goldman Sachs Group Inc.) највисока, од 92 долари.
Глобалната побарувачка на нафта се прогнозира дека дополнително ќе порасне во 2024 година од овогодинешните рекордни нивоа, поттикнато од Кина. Аналитичарите остануваат поделени околу големината на експанзијата и колку лесно таа ќе се задоволи со зголемените залихи.
Прочитај повеќе
Цената на нафтата расте по одлуката на Фед
Цената на нафтата на светскиот пазар порасна од петмесечниот минимум по падот на резервите во САД.
14.12.2023
Нафтата поскапува откако цената паѓаше најмногу по 2018 година
На цената влијаеше зголемената понуда, но и позитивните економски состојби.
11.12.2023
Нафтата близу петмесечен минимум поради стравувањата од прекумерна понуда
Нафтата задржа голем дел од петдневната серија на загуби, што ги доведе цените на најниско ниво од јуни.
07.12.2023
Севкупното расположение е повнимателно отколку на почетокот на оваа година, кога неколку водечки гласови во индустријата предвидуваа дека суровата нафта ќе се врати на 100 долари за барел. Тие повици беа спречени од изненадувачки силното производство од производители како што се САД, Гвајана и Иран.
„Ситигруп“ чија прогноза во декември минатата година дека Брент ќе достигне просек од 80 долари за барел оваа година се покажа реална - смета дека глобалните пазари на нафта ќе имаат вишок следната година.
Со оглед на тоа што растот на светската побарувачка е ограничен од економската и енергетската транзиција и силните залихи од САД, банката очекува дека ОПЕК + ќе треба да продолжи со намалување на производството само за да ги одбрани цените до сегашните нивоа.
Стабилизација на цените
„Останува ОПЕК да го држи пазарот заедно“, рече Макс Лејтон, шеф за истражување на стоки во „Ситигруп“, во интервју за телевизијата „Блумберг“ оваа недела. „Очекуваме стабилизација на цените.“ Изгледите на банката за 2023 година беа надгледувани од ветеранот-аналитичар Ед Морс, кој се повлече минатиот месец по 12-годишен мандат.
Аналитичарката на „ЏП Морган“ (JPMorgan Chase & Co), Наташа Канева, која точно предвиде дека Брент ќе се мачи со троцифрени бројки, проектира дека просечната цена на суровата нафта ќе изнесува 83 долари за барел следната година. Од јуни, банката ја одржува проценката за 2023 година на 81 долар за барел, блиску до реалниот просек од 82,30 долари.
Аналитичарот на „Морган Стенли“, Мартијн Ратс, смета дека брент во просек ќе достигне 85 долари за барел следната година, додека Франсиско Бланч од „Бенк од Америка“ (Bank of America Corp.) прогнозира просек од 90 долари.
Очекувањата на „Голдман Сакс“ се највисоки. Според банката, светската побарувачка на нафта ќе се зголеми за 1,6 милиони барели дневно следната година. Оттаму очекуваат главните членки на ОПЕК да го ограничат снабдувањето. Ова ќе ги остави глобалните пазари со „скромен дефицит“ и ќе ги задржи цените во опсег од 80 до 100 долари за барел, според аналитичарите предводени од Даан Струјвен.
Надвор од Волстрит, перспективата помеѓу две од најистакнатите енергетски институции во светот е уште пополаризирана.
Групата производители на ОПЕК предвидува дека светската побарувачка на нафта ќе се зголеми за енергични 2,2 милиони барели дневно следната година. Спротивно на тоа, Меѓународната агенција за енергија во Париз - која главно ги советува земјите-потрошувачи очекува само половина од таа стапка на раст.
