Половина од товарните бродови го избегнуваат Црвено Море по нападите

Според новите податоци од индустријата, половина од контејнерската флота што редовно транзитира преку Црвено Море и Суецкиот Канал сега ја избегнува маршрутата поради заканата од напади.

Извештајот составен од „Флекспорт“ (Flexport Inc.) покажува дека 299 брода,и со комбиниран капацитет да носат 4,3 милиони контејнери, го промениле курсот или планираат да го направат тоа. Тоа е околу двојно повеќе од пред една недела и е еднакво на околу 18 отсто од глобалниот капацитет.

Пренасочените патувања околу Африка може да потраат дури 25 отсто подолго од користењето на скратениот пат низ Суецкиот Канал помеѓу Азија и Европа, според „Флекспорт“. Тие патувања се поскапи и може да доведат до повисоки цени на сè, од патики преку храна до масло, доколку продолжат подолгите патувања.

Нападите во Црвено Море ги вршат Хутите со седиште во Јемен, кои порачаа дека се насочени кон бродови поврзани со Израел, во знак на поддршка за Палестинците. Сепак, и бродови без директни врски со Израел исто така беа цел, а бидејќи ескалацијата на војната ја загрозува глобалната трговија, оперативна група предводена од САД се обидува да ја зајакне безбедноста на клучниот поморски пат.

Некои бродови се обидуваат да ја прикажат својата неутралност додека и натаму ја користат маршрутата. Три брода - два контејнерски и еден танкер за нафта - моментално минуваат преку маршрутата и сигнализираат дека немаат контакт со Израел, според „Танкер тракерс“ (TankerTrackers.com Inc.) и податоците за следење бродови собрани од „Блумберг“.

Суецки нарушувања

Бродовите што треба да транзитираат низ Суецкиот Канал се пренасочуваат кон други маршрути Bloomberg

Трендот во бројките на „Флекспорт“ ја отсликува одвоената статистика на швајцарскиот шпедитер „Кине и Нагел“ (Kuehne + Nagel International AG), кој од средата покажа дека 364 брода, со капацитет за 5 милиони контејнерски единици од 20 стапки, се пренасочени низ Африка. Тоа е во споредба со 314 пловни објекти на 22 декември.

Податоците го покажуваат обемот на зголеменото поморско нарушување откако Хутите извршија повеќе од 100 напади на комерцијални бродови во текот на изминатиот месец. Контејнерскиот брод „МСЦ јунајтед“ (MSC United VIII) беше цел во вторникот, додека беше на пат кон Пакистан од Саудиска Арабија.

Петнаесет контејнерски брода - од кои 10 управувани од „Маерск“ (A.P. Moller-Maersk A/S) - останаа на маршрутата или неодамна ги напуштија плановите за пренасочување за да преминат во Црвено Море кон Суец, според анализата на „Флекспорт“ за податоците на „Алфалајнер“ (Alphaliner) од средата.

„Маерск“, втората најголема контејнерска компанија во светот, соопшти дека се подготвува да го обнови транзитот на Црвено Море „што е можно поскоро“. „Хапаг-Лојд“ (Hapag-Lloyd AG) посочи дека ќе ги држи своите бродови подалеку од областа дури и по создавањето на оперативната група предводена од САД за заштита на клучниот трговски пат од милитантни напади.

Според податоците на „Кларксонс рисрч“ (Clarksons Research) објавени во четвртокот, пристигнувањата во Аденскиот Залив се намалиле за 40 отсто меѓу 22 декември и 26 декември, во споредба со просекот за првата половина од месецот.

Пристигнувањето на контејнерски бродови е намалено за 87 отсто, на танкерите со гас за 30 отсто и на превозниците на автомобили околу 25 отсто.

Слична е сликата и за транзитите низ Суецкиот Канал, кои беа намалени за околу 45 отсто помеѓу 22 декември и 26 декември за бродовите што се упатија кон југ, според „Кларксонс“.

„Блумберг економикс“ вели дека иако САД и нивните партнери успешно пресретнале голем дел од нападите, таквата одбранбена стратегија е скапа и ризиците сè уште го поскапуваат осигурувањето на превозот.

„Иако коалицијата предводена од САД изгледа успешно на воен план, можеби нема да биде доволна големите бродски компании да го обноват транзитот во Црвено Море“, вели Џерард Дипипо, виш геоекономски аналитичар во „Блумберг економикс“. „Колку подолго продолжуваат нападите на Хутите, толку повеќе ќе се зголемува притисокот врз САД да одат во офанзива, што претставува ризик за ескалација во регионот“.

За компаниите што имаат бродови што заобиколуваат, во тек е исчекувањето за следење на новото време на пристигнување.

Во моментов нема коментари за веста. Биди прв да коментира...

Остави коментар