Златото собори нов рекорд, растат надежите дека Фед ќе почне со кратење

Златото собори уште еден рекорд додека сè повеќе учесници на пазарот мислат дека Федералните резерви (Фед) се поблиску до намалување на каматните стапки. Цената на златото беше поттикната и од геополитичките тензии и растот на побарувачката во Кина.

Цената на благородниот метал во понеделникот скокна на 2.265,73 долари за унца, што е за 1,6 отсто повисоко од цената на затворањето во четвртокот.

Омилената мерка за инфлација на Фед - основниот индекс на личната потрошувачка - покажа забавување на растот на цените во февруари. Податоците се објавени кога повеќето пазари се затворени. Ова би можело да ја мотивира централната банка да ги намали каматните стапки, иако функционерите остануваат внимателни.

Голем број фактори што позитивно се одразуваат на цената на златото предизвикаа раст на металот за околу 14 отсто од средината на февруари. Надежите дека централната банка ќе ги намали каматните стапки, како и геополитичките тензии на Блискиот Исток и во Украина, го поттикнаа растот. Покрај тоа, неколку централни банки купија злато, а голема побарувачка е забележана и во Кина, каде што и Народната банка и институционалните и вонинституционалните инвеститори го купуваат благородниот метал.

По објавувањето на податоците за инфлацијата, претседателот на Фед, Џером Пауел, рече дека податоците се „доста во согласност со очекувањата“ и дека централната банка не брза да ги намали каматните стапки. Инвеститорите неделава ќе добијат нови податоци за американската економија, а аналитичарите предвидуваат дека бројот на работни места ќе се зголеми четврти месец по ред за најмалку 200.000.

Според движењата на пазарите, шансите Фед да ги намали каматните стапки во јуни се 61 отсто, а во четвртокот движењата укажуваа на веројатност од 57 отсто. Падот на каматните стапки му оди во прилог на златото бидејќи тоа како благороден метал не носи камата.

„Растот на златото е поттикнат од податоците за инфлацијата и коментарите на Пауел. Пазарот станува сè посигурен дека Фед ќе започне да ги намалува стапките во јуни“, рече Ворен Патерсон од ИНГ (ING Groep NV). Но „нема да биде потребно многу за да почне да паѓа цената на краток рок“, а првиот негативен фактор може да биде позитивен извештај за пазарот на трудот.