Златна доба за златото, Македонија не ги зголемува резервите

Цената на златото на светските берзи забележува засилен раст и изминативе денови достигна цена од 2.169 долари за унца, што е зголемување за 8,9 проценти за период од еден месец. Со оглед на тоа што дел од македонските девизни резерви е во злато, прашавме во Народната банка како влијае тоа врз македонските девизни резерви. Оттаму велат дека златото во девизните резерви се вреднува по пазарна цена, така што растот на цената доведува до повисоко ниво на девизните резерви.

Bloomberg Chartmaker

Според податоците на Народната банка, на крајот на февруари 2024 година официјалните девизни резерви изнесуваат 4,34 милијарди евра и во однос на претходниот месец бележат зголемување за 10,7 милиони евра. Најголем дел од девизните резерви е пласиран во хартии од вредност (58,8 проценти), по што следуваат валутите и депозитите (31,6 проценти) и монетарното злато (9,6 проценти). Народната банка подолг период девизните резерви во злато ги одржува во количество од 220.000 унци односно околу 6,2 тони.

На прашањето дали Народната банка планира зголемување на резервите во злато, оттаму објаснуваат дека златото, како стратегиско инвестициско средство во рамките на девизните резерви е во функција на обезбедување сигурност и ликвидност преку диверзификација на инвестициите.

„Во изминатите години Народната банка го одржува количеството на златото на релативно стабилно ниво, во просек од околу десет проценти од девизните резерви. Учеството на златото во девизните резерви на Република Северна Македонија соодветствува на просечната застапеност на злато во девизните резерви во меѓународни рамки. Во таа смисла, определба на Народната банка е златото да се одржува на тековното стабилно ниво“, велат од Народната банка.

Од централната банка неодамна за „Блумберг Адрија“ објаснија дека повратот на девизните резерви е определен од динамиката на приносите и каматните стапки на инструментите на финансиските пазари, што упатува на фактот дека во различни периоди поединечните класи на средства покажуваат различни остварувања.

„На долг рок, инвестирањето во хартии од вредност носи поповолни резултати, заради што и најголем дел од девизните резерви се инвестира во ваков тип инструменти“, соопшти Народната банка.

На прашањето како Народната банка одлучува каде ќе ги инвестира девизните резерви и на колкав период се ревидира инвестициската политика, оттаму одговорија дека  Законот за Народната банка и политиката за управување и инвестирање на девизните резерви на Република Македонија ги дефинираат видовите на средства во кои може да се инвестираат девизните резерви и начините на управување со ризиците.

„Оперативните аспекти на управувањето вклучуваат дефинирање на структурата на инструменти во кои се инвестираат девизните резерви, при што оваа рамка се ревидира најмалку еднаш годишно и е во согласност со основните принципи за управување. Притоа, на континуирана основа се следат движењата на меѓународните пазари, при што инвестициската поставеност се приспособува во согласност со променетите пазарни услови и согледаните трендови“, информираа од НБРM.

Раст на резервите во злато

Сепак, централните банки продолжија да трупаат резерви во злато, а тоа се случуваше и минатата година. Само за девет месеци лани имаше раст од 14 проценти, иако трендот беше побавен во втората половина од годината поради продажбата од Турција.

Историски гледано, златото се гледа како заштита на инфлацијата, така што нема сомнение дека тоа е главната причина за зголемувањето на неговата цена во текот на 2021-2023 година.

Од нашиот аналитички тим сметаат дека сегашната глобална макроекономска перспектива ќе биде најистакнат двигател за цената на златото.

„Повеќето европски земји се во рецесиско опкружување, а очекувањата се дека САД ќе паднат во рецесија некаде во 2024 година. Златото ќе има корист од тоа и цената ќе оди нагоре. Монетарните политики ќе ги поддржат рецесиското опкружување и нагорната позиција на златото, со оглед на тоа што очекуваме да останат во рестриктивните зони барем до средината на 2024 година“, вели Марина Петров Савиќ, виша аналитичарка за пазари во „Блумберг Адрија“. 

Според неа, златото ќе продолжи да ја надминува берзата, сè додека има ниски очекувања за глобалната економска перспектива, а во прилог на цената на златото ќе одат и глобалните геополитички неизвесности.

„Централните банки може да го олеснат темпото на купување во 2024 година, но не очекуваме значителна распродажба да ја намали цената, имајќи ги предвид сите други двигатели. Се смета дека доларот ќе ослабне во 2024 година во однос на валутната кошница, што ќе ги зголеми побарувачката и цената на златото“, укажува Савиќ.

Како прво, таа посочува дека послабиот долар значи поприфатлива инвестиција во злато, што ја зголемува побарувачката, бидејќи цената на златото е деноминирана во долари, а како второ - златото и доларот се гледаат како резервни валути и како такви имаат претежно негативни корелации.

„Дополнително, трошоците за производство на злато се зголемени во последните неколку години, или поради зголемените трошоци или поради намалениот квалитет на златната руда, што ги поддржува сегашните покачени цени“, вели Савиќ.  

Андреј Пулејков, извршен директор во „КБ Публикум инвест“ АД Скопје, во изјава за „Блумберг Адрија“ на почетокот на годината истакна дека очекува понатамошен раст на цената.

„Прво, исклучително високата побарувачка на злато од страна на централните банки во светот (со акумулација од над 2.000 тони само во последните две години) ќе продолжи и во текот на 2024 година“, посочува Пулејков.

Тој објаснува дека геополитичките промени во светот, како и ефектите на монетарната политика во САД, сe меѓу причините зошто централните банки (особено од Истокот) постепено го намалуваат нивото на девизни резерви деноминирани во американски долари за сметка на поголема диверзификација во злато и други валути.

„И покрај таквиот тренд, учеството на златото во вкупните девизни резерви сè уште е многу пониско од историскиот просек, кој пред 50 години се движел на ниво од 75 до 80 проценти, додека денес изнесува само 20 проценти“, вели Пулејков.

Во моментов нема коментари за веста. Биди прв да коментира...

Остави коментар