Кина создава фонд за чипови од 47,5 милијарди долари за самоодржливост

Кина го формира најголемиот инвестициски фонд за полупроводници во земјата досега за да го поттикне развојот на домашната индустрија за чипови, најнов обид на Пекинг да постигне самодоволност додека САД се обидуваат да го ограничат нејзиниот раст.

Во третата фаза Националниот инвестициски фонд за индустрија за интегрирано коло собра 344 милијарди јуани (47,5 милијарди долари) од централната влада и разни државни банки и претпријатија, вклучувајќи ја и „Индастриал и комршл банк“ (Industrial & Commercial Bank of China Ltd.), објави „Тијананча“ (Tianyancha), онлајн платформа што агрегира официјални информации за регистрација на компанија. Фондот бил основан на 24 мај.

Најголем акционер е кинеското министерство за финансии, додека инвестициските фирми во сопственост на локалните власти во Шенжен и во Пекинг исто така придонеле. Владата на Шенжен финансираше неколку фабрики за производство на чипови во јужнокинеската провинција Гуангдонг, во обид да ја ослободи „Хуавеј“ (Huawei Technologies Co.) од годините во кои се активни американски санкции што ја исклучија од голем број увезени полупроводнички компоненти.

Суперсилите предводени од САД и од Европската Унија издвоија речиси 81 милијарда долари за да ја поттикнат следната генерација на полупроводници, што ја ескалира глобалната пресметка со Кина за надмоќ на пазарот на чипови. Кина исто така беше и водечки потрошувач во изминатата деценија, користејќи државен капитал за финансирање локални производители на чипови, како што е „Семикондактр“ (Semiconductor Manufacturing International Corp).

Најновото инвестициско средство, познато како „Биг фанд 3“ (Big Fund III), го прикажува обновениот притисок од Пекинг да изгради сопствен синџир на снабдување со полупроводници, бидејќи САД ги повикуваат сојузниците - вклучувајќи ги Холандија, Германија, Јужна Кореја и Јапонија - дополнително да ги заострат ограничувањата на пристапот на Кина до технологијата на чипови и да ги затворат дупките во постојните контроли за извозот.

Акциите на главните кинески компании на чипови скокнаа во понеделникот. SMIC, најголемиот производител на чипови во Кина, порасна дури за 5,4 отсто во Хонгконг. „Хуа Хонг Семикондактр“ (Hua Hong Semiconductor Ltd), помалиот конкурент, се искачи за повеќе од 6 отсто.