.webp){kind=icon}
Кина сигнализира дека е подготвена да воведе царини до 25 проценти за увезените автомобили со големи мотори, бидејќи трговските тензии ескалираа со САД и Европската Унија.
Кинеската стопанска комора при ЕУ соопшти дека е информирана за потенцијалниот потег од „инсајдери“, според соопштението објавено на X. Давачките ќе влијаат на европските и американските производители на автомобили и ќе имаат „значително“ влијание врз односите со ЕУ.
Пекинг ги засилува заканите за одмазда додека се наближува рокот за ЕУ да ги објави резултатите од нејзината истрага за кинеските субвенции за електрични возила. Блокот мора да ги информира кинеските извозници дали има намера да воведе царини до почетокот на јуни, а тие би можеле да стапат во сила еден месец подоцна, според групацијата Евроазија.
Трговските тензии меѓу ЕУ и Кина се зголемија откако беше најавена истрагата за електричните автомобили, при што посетата на претседателот Шји Џјинпинг на Европа месецов навидум направи малку за да се намали притисокот. Шји се обидуваше да го одврати блокот да оди по истиот пат како САД, кои открија широк сет на давачки за увозот од Кина - што ја зголеми загриженоста во Пекинг дека американските сојузници може да го следат примерот.
Bloomberg Mercury
„Одмаздничките трговски истраги и предупредувањата на Кина не ја одвраќаат ЕУ“, напишаа аналитичарите на групацијата Евроазија во белешка во вторникот. „Брисел е желен да испрати силен сигнал до Пекинг со својата истрага за електрични автомобили дека ЕУ ќе се спротивстави на кинеските субвенции и прекумерен капацитет“.
Кинеската комора се повика на интервјуто објавено од весникот „Глобал тајмс“ на владејачката Комунистичка партија во вторникот, во кое Лиу Бин, главен експерт во кинескиот центар за автомобилска технологија и истражување, повика на привремено зголемување на тарифната стапка за автомобили со мотори поголеми од 2,5 литри.
Кина увезе 250.000 автомобили минатата година и правилата на Светската трговска организација ќе дозволат царина до 25 отсто, се цитира Лиу во извештајот. Сегашната наплата за увоз на патнички автомобили од Европа е 15 проценти, според страницата за пребарување тарифи на Министерството за трговија. Министерството не одговори на барањето за коментар.
„Најпогодени производители на автомобили ќе бидат ’Тојота’, ’Мерцедес Бенц’ и БМВ“, рече Даниел Колар, шеф на консултантската компанија „Инралинк“ за автомобилска пракса. Јапонските автомобили, како што е „тојота“, ќе бидат погодени само ако Кина воведе царини за увоз од сите нации, наместо да цели на испораките од САД или од ЕУ.
Покрај ударот во трговијата со автомобили, Кина неодамна навести дека би можела да наметне такси за европското вино и млечни производи и започна истрага за европскиот извоз на ракија.
Во услови на глобална загриженост за зголемениот извоз на Кина, индустријата за електрични возила привлекува особено големо внимание. Кина произведува повеќе електрични автомобили од кое било друго место и контролира поголем дел од синџирот на снабдување со батерии. Со ценовна војна и забавување на економијата дома, нејзините производители на автомобили се обидуваат да се прошират во странство. Минатата година извезоа 1,55 милион електрични автомобили, од кои околу 40 проценти во Европа.
Администрацијата на Бајден претходно месецов објави 100 проценти царини за кинеските електрични автомобили, додека ЕУ ги истражува субвенциите на Пекинг во низа индустрии, што ги натера кинеските фирми да се повлечат од тендерите за железница и енергија.
„Одредени земји и региони презедоа рестриктивни мерки во секторот на нови енергетски возила, кои се спротивни на концептот за зелен развој“, рече Лиу во интервјуто за „Глобал тајмс“. „Ваквите мерки само ќе им наштетат на интересите на сопствените потрошувачи“.
