БМВ очекува штета од трговската војна во висина од една милијарда евра

БМВ (BMW AG) очекува ескалацијата на трговските конфликти меѓу САД, Европа и Кина да го чини производителот на автомобили околу една милијарда евра (1,1 милијарда долари) годинава, рече главниот извршен директор Оливер Зипс.

„Не мислиме дека сите овие царини ќе траат многу долго, иако некои од нив може сепак да потраат подолго“, рече Зипс во денешното интервју за телевизијата „Блумберг“. „Со процена на трошоците од една милијарда евра, ние сме доста безбедни“, додаде тој.

БМВ и другите европски производители на автомобили се подготвуваат да го видат целосниот опсег на планираните царини на претседателот Доналд Трамп за возилата што се увезуваат во САД. Даноците се закануваат да ги погодат не само автомобилите произведени во Европа туку и оние произведени во погоните во Мексико и во Канада, со кои производителите на автомобили работат со години според претходните трговски договори.

БМВ веќе се соочува со давачки за возилата што ги произведува во својата фабрика во Сан Луис Потоси, Мексико, а кои се наменети за извоз во САД. Трамп ги одложи царините за компаниите во согласност со еден од трговските договори (USMCA), но БМВ не ги исполнува локалните правила за содржината.

Во исто време БМВ е погоден од царините на Европската Унија за возилата увезени од Кина, каде што неговиот бренд „Мини“ (Mini) произведува електричен автомобил и теренец. БМВ им се придружи на кинеските производители во оспорувањето на наметнатите давачки пред суд.

„Ако претерате со царините, тоа почнува негативна спирала за сите учесници на пазарот“, рече Зипс, додавајќи дека во таа игра нема победници.