Кина го презема пазарот за електрични возила во Македонија - пет вести на денот

Францускиот фудбалски гигант Пари Сен Жермен (ПСЖ) на биткоин-конференцијата во Лас Вегас објави дека во билансот на клубот држи 120 биткоини, со моментална вредност од околу 14,5 милиони долари. 

Потегот, објавен набрзо по освојувањето на првата историска титула во Лигата на шампионите, брзо одекна во светските медиуми. Сепак, ПСЖ не го направи овој потег поради шпекулација или финансиска потреба, туку за да „зборува на јазикот на новата генерација навивачи“.

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Кинеските електрични автомобили го земаа приматот во Македонија

Официјалната статистика на Царинската управа за првата половина од годината покажува дека уделот на електричните возила во вкупниот увоз останува на нивото од околу 0,5 отсто.

Во периодот од јануари до јуни во земјава влегле вкупно 34.587 патнички возила, а од нив само 202 се електрични.

Евиденцијата покажува дека во текот на првата половина од годинава најмногу се увезувале кинески брендови. Тоа е различно од лани, кога најувезувани биле електричните модели на европските производители.

Царините на Трамп удрија врз автомобилската индустрија

САД и Европската Унија (ЕУ) конечно постигнаа трговски договор. Но повисоките царини што беа во сила пред договорот веќе предизвикаа штета. Трите месеци неизвесност и високи царини веќе се одразија врз работењето на автомобилските компании, кои и пред трговската војна се соочуваа со повеќекратни предизвици. 

Повеќето производители во второто тримесечје забележале пад на бројот на испорачани возила. Најголем пад во второто тримесечје забележа „Тесла“ – 13 проценти, по неа следува „Волво“ со пад од 12 проценти. Продажбата на возила од брендот „Мерцедес“ се намали за 8,7 проценти. 

Податоците покажуваат дека во моментов најголеми проблеми имаат премиум производителите. Намалени испораки се забележани и кај „Ауди“ (– 8,2 отсто), „Порше“ (– 4,3 отсто) и БМВ (– 2,6 отсто). На премиум тронот сè уште се наоѓа БМВ, кој во второто тримесечје им испорача над 550.000 возила на купувачите.

„Тесла“ му доделува премија на Маск

Компанијата „Тесла“ (Tesla) му додели привремена награда од 96 милиони акции на својот директор Илон Маск, додека работи на подолгорочен план за неговата плата. Овој предлог ќе биде ставен на гласање на годишниот состанок на акционерите што ќе се одржи на 6 ноември.

По оваа објава, акциите на „Тесла“ пораснаа за 2,6 отсто. Од одборот на компанијата истакнаа дека е исклучително важно Маск да остане на чело на производителот. Оваа исплата, како што велат, е прв чекор и „знак на добра волја“, со порака: „Договор е договор“.

Претходниот пакет за компензација на Маск, вреден над 50 милијарди долари, беше поништен од судот во американската сојузна држава Делавер по тужба од акционер. Случајот сè уште се разгледува на Врховниот суд во таа држава.

Со оваа нова иницијатива, „Тесла“ ја потврдува силната улога што Маск ја има во компанијата, што најверојатно значи дека тој нема скоро да се повлече од функцијата директор. Маск е на таа позиција од 2008 година и неодамна изјави дека планира да ја води компанијата најмалку уште пет години.

Што нуди едно нетипично „ферари“ за 770 илјади евра?

За да го погледнете одблизу „ферарито“, обично треба да се потрудите. Да се наведнете и да клекнете. Кај „пуросангре“ тоа не е потребно - тој е огромен. Долг е речиси пет метри, широк повеќе од два метра и со висина од 159 сантиметри, не е премногу висок. И покрај сосема необичниот изглед, има голем број интересни дизајнерски детали.

Неговиот облик се карактеризира со долга хауба и кабина поместена кон задниот дел. Пред кабината се протега воздушен мост, кој, слично на „Ф12 берлинета“ (F12 Berlinetta) паркиран до него, го пренасочува воздухот од хаубата подалеку од кабината и преку задните страни. Покривот завршува со спојлер и закосен заден прозорец, кој нема бришач. Задниот дел изгледа многу бомбастично иако нема егзотични пропорции на суперавтомобил.

Уште една слаба жетва на какао ќе ги одржи цените високи

Голем дел од Западна Африка, дом на најголемите светски производители на какао, се соочува со уште една разочарувачка жетва. И покрај подоброто време во споредба со претходните сезони, структурните проблеми - како што се стареењето на дрвјата и болестите на земјоделските култури - може да продолжат да го ограничуваат производството и да ги одржуваат цените високи.

Односот резерви/потрошувачка - клучна мерка за понудата во однос на побарувачката - е блиску до најниското ниво од барем 1981 година, според Меѓународната организација за какао. Во САД, резервите од какао во складиштата што се следат од берзата, исто така, паднаа доста под нивниот десетгодишен просек.