Кинеските електрични автомобили го зедоа приматот во Македонија

Интересот расте, но бројките не. Податоците за увоз на електрични возила остануваат скромни, па дури и се намалуваат во однос на претходниот период.

Официјалната статистика на Царинската управа за првата половина од годината покажува дека уделот на електричните возила во вкупниот увоз останува на нивото од околу 0,5 отсто.

Во периодот од јануари до јуни во земјава влегле вкупно 34.587 патнички возила, а од нив само 202 се електрични.

Исто така, увозот на електрични возила покажува тренд на опаѓање. Во текот на првите шест месеци од годинава се увезени дури 50 електрични возила помалку споредено со 2023 година.

Нема субвенции, нема инфраструктура

Главниот проблем за слабата продажба на електричните возила веќе не е цената. Разликата меѓу возилата на погон со внатрешно согорување и електрични возила се намали, а во некои случаи дури и се изедначи. На македонскиот пазар најевтините модели на електрични возила чинат околу 22.000 евра, а теренските возила од 36.000 евра нагоре.

Многу поголем проблем е инфраструктурата односно недостигот од полначи, рече во разговор за телевизијата „Блумберг Адрија“ Сашо Кочов, бренд-менаџер на „Џили“ – „Делфино мобилити груп“. Вкупно, земјава располага со педесетина полначи, што е далеку од доволно.

Следен проблем е тоа што државата не обезбедува поддршка за купување електрично возило. Има ослободување од определени давачки, на пример не се плаќаат акциза и екотакса, тоа изнесува од 6 до 16 отсто од вредноста, што е недоволно за да ги стимулира граѓаните да купат еколошки автомобил. Во земјите од регионот субвенциите се многу позначителни.

„На пример, во Албанија давачките за купување електрично возило се 0. Нема царина, нема акциза, нема ДДВ. Плаќате само набавна цена и транспортни трошоци, па овие возила таму се многу поевтини“, вели Кочов.

Најмногу се купуваат кинески електрични возила

Евиденцијата на Царинската управа покажува дека во текот на првата половина од годинава најмногу се увезувале кинески брендови. Тоа е различно од лани, кога најувезувани биле електричните модели на европските производители.

Во Европа продажбата на електрични возила урива рекорди

Во Европа продажбата на електрични возила расте по стагнацијата што настана поради укинувањето на субвенциите од државите.

Германија достигна рекорд во првата половина од годинава и секое петто новорегистрирано возило е електрично. Продажбата на електрични возила во земјата расте и покрај тоа што вкупната продажба на автомобили е во пад, покажуваат податоците на Европската асоцијација на производители на автомобили.

Во периодот од јануари до јуни се продадени 248.726 единици, што претставува раст од 35 отсто во споредба со истиот период лани. Уделот на електрични возила што се регистрирани за пат изнесува 17,7 отсто.

Растечкиот интерес за електрични автомобили во Европа главно се должи на новите европски регулативи за нулта емисија.