Уште една слаба жетва на какао во Западна Африка ќе ги одржи цените високи

Голем дел од Западна Африка, дом на најголемите светски производители на какао, се соочува со уште една разочарувачка жетва. И покрај подоброто време во споредба со претходните сезони, структурните проблеми - како што се стареењето на дрвјата и болестите на земјоделските култури - може да продолжат да го ограничуваат производството и да ги одржуваат цените високи.

Според просечната процена на осумтемина трговци и аналитичари што ги анкетираше „Блумберг“, се предвидува дека Брегот на Слоновата Коска, најголемиот производител, ќе собере 1,4 милион тони за време на главната жетва во периодот меѓу октомври и март. Тоа е приближно во согласност со очекуваниот вкупен род за главната жетва сезонава, велат луѓе запознаени со бројките.

Во соседна Гана, каде што жетвата започнува месецов, изгледите се помрачни: производството се проектира на 620.000 тони - далеку под историскиот врв на земјата.

Резултатот значи дека глобалната понуда на какао веројатно ќе остане ограничена, дури и кога послабата побарувачка нуди одредено олеснување по проценетиот недостиг од 40.000 тони годинава.

Односот резерви/потрошувачка - клучна мерка за понудата во однос на побарувачката - е блиску до најниското ниво од барем 1981 година, според Меѓународната организација за какао. Во САД, резервите од какао во складиштата што се следат од берзата, исто така, паднаа доста под нивниот десетгодишен просек.

„Не очекувам значително закрепнување на производството“, рече Оран ван Дорт, аналитичар во „Рабобанк“. По години недоволно инвестирање, „сѐ повеќе е веројатно дека комбинираниот потенцијал за земјоделски култури на Брегот на Слоновата Коска и Гана се намалува од година на година“.

Bloomberg Mercury

 

Тоа врши притисок врз производителите на чоколадо и би можело да ги одржи цените високи. Фјучерсите за какао паднаа за околу 40 проценти од рекордниот максимум од речиси 13.000 долари за тон достигнат во декември, но цените и натаму остануваат далеку над петгодишниот просек.

„ЏП Морган“ прогнозира дека цените ќе останат над 6.000 долари за тон, додека „Сити“ очекува 7.000 долари во следната година.

„Овој пазар ќе се тргува повисоко подолго време“, рече Трејси Ален, стратег во „ЏП Морган“. „Без оглед на тоа каква е ситуацијата со понудата и дефицитот следната година, нема да се вратиме на петгодишните просечни нивоа во скоро време“.

Bloomberg Mercury

 

Во Западна Африка следните три месеци се особено критични. По дождовната сезона од април до јуни, мешунките од какао сега влегуваат во својата врвна фаза на развој. Изобилството на дождови во јуни ги ублажи грижите пред сувиот јули, но ако сушните услови продолжат и во август, перспективите би можеле да се влошат, според аналитичарката на „Марекс“, Ема Саниг.

Камерун се појави како светла точка, при што се очекува производството да се зголеми за 12 проценти, на 300.000 тони, според Советот за какао и кафе во земјата – што е спротивно на регионалниот тренд.

На други места бројките се помрачни. На пример, се очекува производството на какао во Нигерија да падне за 11 отсто, на 305.000 тони во сезоната 2025-2026, што е намалување од проектираните 344.000 тони во тековната, која завршува во септември.

Муфутау Аболаринва, раководител на Здружението за какао на Нигерија, рече дека променливите временски услови ги одложија клучните врнежи од дожд, а силните ветрови ги оштетија свежите цветови и младото какао, намалувајќи го бројот на мешунки што можеа да го зголемат приносот.

Дури и ако производството во регионот се подобри, тоа сепак ќе претставува ниско ниво поради двете последователни слаби сезони. Тоа ја загрозува доминацијата на Западна Африка на глобалниот пазар, бидејќи земји како Еквадор продолжуваат да го зголемуваат производството, рече Ален од „ЏП Морган“.

Во моментов нема коментари за веста. Биди прв да коментира...

Остави коментар