За да ги намали трошоците, „Нестле“ ќе става повеќе бисквити наместо какао во производите

Компанијата „Нестле“ (Nestle SA) се обидува да го зголеми растот на продажбата од историски ниските нивоа со зголемување на цените на производите, како што е кафето, во услови на ескалација на трошоците за стоки, а во исто време се обидува и да ги заузди самите трошоци.

Приходите на компанијата во четвртиот квартал се зголемија за 2,7 проценти на органска основа, објави денеска производителот на кафето „неспресо“ (Nespresso) и слатките „киткет“ (KitKat). Тоа е над процените на аналитичарите, кои прогнозираа раст од околу два отсто. Гледано за целата година, продажбата се зголемила за 2,2 проценти, што е еден од најлошите перформанси во последните децении.

Главниот извршен директор Лоран Фрејкс, кој минатата година го презеде кормилото на корпорацијата, по ненадејното повлекување од функцијата на Марк Шнајдер, се обидува да го заживее намалениот раст на „Нестле“ со помош на повисоки трошоци за реклами и фокусирање на побрзорастечките брендови. За да ослободи средства за инвестиции, „Нестле“ претходно објави дека ќе обезбеди дополнителни 2,5 милијарди швајцарски франци (2,7 милијарди американски долари) преку заштеда на трошоци до 2027 година.

Производителот на „нескафе“ (Nescafe) соопшти дека веќе обезбедил околу 300 милиони швајцарски франци од намалувањето на трошоците годинава. Најголемиот дел од овие заштеди доаѓа од набавките, а остатокот од оперативната ефикасност, рече Фрејкс на разговор со новинарите.

Bloomberg Mercury

 

„Нестле“ ја повтори својата прогноза со која очекува подобрување на растот на органската продажба во 2025 година. Исто така, од компанијата велат дека клучната маржа на профитабилност годинава ќе биде најмалку 16 проценти, што сепак е помалку од 17,2 отсто, колку што изнесуваше лани, а тоа е така, како што велат, бидејќи се инвестира во сопствените брендови.

Додека на чело на компанијата беше Шнајдер, „Нестле“ се потпираше на повисоки цени за да ја поттикне продажбата за време на неодамнешниот инфлациски период, што ги поттикна купувачите да се префрлат на поевтини брендови. Компанијата оттогаш имаше проблеми да ги врати потрошувачите назад. Претседателот на „Нестле“, Пол Булке, во ноември за швајцарскиот телевизиски канал „Телезури“ (TeleZüri) изјави дека поскапувањата на „Нестле“ отишле предалеку и дека за одредени производи е потребно да се направи чекор назад.

Bloomberg Mercury

 

Но тоа е комплицирано во услови на зголемени трошоци за кафе и какао, кои лани се удвоија поради лошите временски услови во Бразил и во Виетнам. Планот на „Нестле“ е да остане конкурентен со тоа што ќе ја постигне посакуваната цена со помош на заштедите на трошоците. Сепак, цените на кафето ќе се зголемат малку повеќе од очекуваното, изјави во ноември Фрејкс на новинарите.

Иако постојните добропознати рецепти, како тие за „киткет“, нема да се променат, во поновите производи може да се вклучи поголем дел од бисквити или наполитанки за да се намалат високите трошоци за какао, додаде Фрејкс.