Кафето станува уште поскапо бидејќи цената на арабиката е највисока од 1977 година

Фјучерсите на кафето го продолжија својот неконтролиран раст и се искачија на највисоко ценовно ниво во повеќе од четири децении, главно поради грижите за глобалната понуда, кои се закана за дополнително зголемување на трошоците.

Цената на зрната арабика, сортата што е омилена за специјалните пијалаци, се искачи дури за 3,9 отсто, достигнувајќи го највисокото ниво од 1977 година. Цената на оваа сорта годинава се зголеми речиси за 70 отсто.

Тешката суша што го зафати Бразил на почетокот на годинава ги зголеми грижите за тамошното производство. Тоа се дополнува со грижите за другата сорта на зрна кафе, која главно се произведува во Виетнам, откако клучниот појас за кафе беше погоден од суша за време на периодот на растење, а потоа и од обилни дождови што пристигнаа на почетокот на жетвата.

Бразил и Виетнам се двете земји што се најголеми глобални производители на кафе, при што Бразил го извезува претежно врвното зрно арабика, а Виетнам е лидер на пазарот за поевтината робуста.

Ваквиот раст на берзанските цени ќе ја зголеми болката со која се соочуваат кафулињата и мелниците, што на крајот ќе ги зголеми трошоците за потрошувачите. Низ синџирот на снабдување продавачите ги зголемија цените и ги укинаа попустите за да ги заштитат своите маржи. „Нестле“ (Nestle CA), најголемиот производител на кафе во светот, во ноември изјави дека ќе ги зголеми цените и ќе ги направи пакувањата помали за да го намали влијанието на поскапите зрна.

Движење на цената на фјучерсите за сортата кафе арабика Bloomberg Mercury

„Ценовниот раст се должи на голем број сложени околности, вклучувајќи ја и загриженоста за производството на Бразил во претстојната сезона 2025-2026 година, како и предизвиците за испорака и логистика“, рече аналитичарот на „Рабобанк“ (Rabobank), Карлос Мера.

Според него, други фактори што придонесуваат за поскапување на кафето се неизвесноста околу датумот на имплементирање на новите правила за уништување на шумите на Европската Унија, како и потенцијалните царини најавени од администрацијата на Доналд Трамп.

Неодамнешните грижи за снабдување со арабика се надоврзуваат на неколку сезони на слаби посеви не само во Бразил туку и во други клучни земји за одгледување кафе. Вториот по големина производител на арабика, Колумбија, сè уште закрепнува од влијанијата на сувото време што ја зафати претходно земјата, а неодамнешните обилни врнежи предизвикаа загриженост за потенцијална штета на посевите во повеќе држави производители на кафе, вклучувајќи ги Костарика и Хондурас.

Движење на цената на кафето арабика Bloomberg Mercury

Кафето робуста, кое е поекономично кафе и се користи во инстант пијалаци, исто така забележа раст на цената годинава, поскапувајќи за околу 88 проценти.

Другите суровини на пазарите, како суровиот шеќер, бележат раст, додека цената на какаото малку се намалува.