Кафето ќе стане уште поскапо задоволство

Шолја кафе ќе стане уште поскапа бидејќи постојаните прекини во снабдувањето ги зголемија трошоците за премиум зрна oд сортата арабика на највисоко ниво во последните 13 години.

Фјучерсите се зголемија дури за 4,8 отсто, до 2.718 долари за фунта во Њујорк, што е највисоко од 2011 година. Цените се зголемени за приближно 40 отсто годинава, бидејќи недостигот од поевтини зрна од сортата робуста ја поттикна побарувачката за арабика, која е фаворизирана од специјализираните синџири.

Растот на кафето ја зголемува тековната загриженост за суровото време кај најважниот производител Бразил. Замјата ја завршува својата жетва 2024-2025 година, а изгледите за производство се ослабени откако топлината и сушата нанесоа штета во полињата.

„Сè е до времето“, рече Кона Хаке, раководител на истражување во „ЕД енд Ф мен“ (ED&F Man), посочувајќи на условите во главните региони за одгледување кафе во Бразил и неповолните прогнози за дожд за следните две недели.

Климатските промени значително влијаат врз производството на кафе, предизвикувајќи проблеми во главните земјоделски региони. Неочекуваните временски услови, како екстремните суши и поплави, особено во Бразил и во Колумбија, ги намалуваат количеството и квалитетот на посевите. Температурните флуктуации ги оштетуваат чувствителните растенија, што води до помали приноси.

Дополнително, зачестените промените во условите, од дожд на сонце, го нарушуваат традиционалниот циклус на одгледување, што предизвикува тешкотија за фармерите да предвидат кога ќе имаат успешни жетви. Тоа влијае и на глобалната понуда, зголемувајќи ги трошоците за кафе и принудувајќи многу земјоделци да бараат алтернативни култури или локации за одгледување.

Сортата арабика со највисока цена во последните 13 години Blooomberg

„Потенцијалот за арабика во 2025/2026 виси на конец“, рече аналитичарот на „Рабобанк“ (Rabobank), Карлос Мера. Врнежите во областите во кои расте арабика се постојано под нормалните нивоа од почетокот на сушната сезона во април, рече тој. „Овој проблем доаѓа во време кога индустријата за кафе страда од застој на пристаништата во неколку земји, глобален недостиг од контејнери, прекини околу Црвено Море, а исто така и разочарувачки посеви во Виетнам“.

И цените на робуста растат повеќе од една недела, скокајќи дури за 4,2 отсто во понеделникот.

Цената на кафето глобално се зголемува поради неколку клучни фактори. Покрај климатските промени, зголемените трошоци за транспорт и гориво го отежнуваат извозот, а на тоа се додава и глобалната инфлација, која ги притиска трошоците за труд и суровини. Дополнително, побарувачката за кафе продолжува да расте, особено во Азија, што дополнително го зголемува притисокот врз цената на овој популарен пијалак.

Растот на цените на кафето ги пумпа цените и на другите пијалаци. Цените на сокот од портокал се зголемија поради недостатоците во производството, а рекордниот пораст на фјучерсите на какаото ги зголемува трошоците за чоколадните пијалаци и десертите. Сепак, цените за другите главни производи, како житарките, остануваат придушени, намалувајќи ја вкупната инфлација на храната.