Производството на природен гас во Велика Британија се намалува побрзо од очекуваното и доведува до поголема зависност од увоз, па индустриската комора бара олеснувања од владата за да се поттикнат инвестициите.
„Производството годинава до август падна за околу 13 проценти, споредено со истиот период лани, а слична стапка е можна за цела 2024 година. Треба да бидеме малку загрижени за производството и брзите стапки на опаѓање“, истакна во интервју Рос Дорнан, менаџер за пазарно известување во „Офшор енерџис“ (Offshore Energies UK).
Производството на гас во Велика Британија е повеќе од преполовено во последните 15 години
Bloomberg Mercury
Групата, позната како ОЕУК, бара во владиниот есенски буџет, кој треба да се достави на 30 октомври, да се предвиди поддршка за домашни енергетски инвестиции. Претходната конзервативна влада воведе неочекуван данок на добивката од нафта и гас за време на енергетската криза пред две години, а лабуристите планираа уште повеќе да ја зголемат таа давачка за да ја намалат фискалната празнина.
Новиот даночен систем на Обединетото Кралство може да доведе до пад на инвестициите во нафта и гас од дури 80 проценти во следните пет години, проценува ОЕУК.
Според податоците на комората, производството на енергија во Британија сега опслужува само 60 отсто од побарувачката. Во меѓувреме европскиот пазар на гас останува чувствителен на ризиците од снабдувањето, при што цените остро се менуваат поради геополитичките тензии и непланираните прекини во испораките.
Нафтата е во опаѓање
Производството на нафта во Велика Британија исто така опаѓа, со очекуван пад од околу 10 проценти во текот на годинава, посочува Дорнан. Од јануари до август производството на нафта во просек изнесуваше 660.000 барели дневно, рече тој, додавајќи дека бројките за целата година може да бидат малку помали.
Дневното производство на нафта и на гас во земјата во посочениот период во просек изнесуваше 1,11 милиони барели, што на годишна основа е за околу 11 отсто помалку.
Инаку, според плановите на Управата за транзиција на Северно Море, која е регулатор на индустријата, дневното производство до крајот на деценијата треба да се намали на околу 700.000 барели.
„Тоа е можно, но тоа може да се постигне само преку прогресија на нови инвестиции со подобра стапка од таа што моментално се остварува. И тоа претставува голема грижа“, рече Дорнан.
.webp){kind=icon}
