Водството на Трамп води кон пад на златото и раст на доларот

Златото паѓа, а доларот расте додека републиканскиот кандидат Доналд Трамп ја зголемува предноста на претседателските избори во САД.

Вредноста на златните прачки падна дури за 1,4 отсто откако клучните држави во бојното поле Северна Каролина и Џорџија испаднаа наклонети кон Трамп.

Се очекуваше дека благородниот метал ќе ја зголеми вредноста во согласност со растот на веројатноста за победа на Трамп, но се чини дека тоа не е веќе случај поради растот на доларот, што инаку го прави благородниот метал поскап за многу купувачи. Индексот на вредноста на американската валута се зголеми дури за 1,6 проценти, достигнувајќи едногодишен максимум, а приносите од обврзниците исто така се зголемија, што претставува уште една пречка за раст на цената на благородниот метал.

Сепак, можно е крајот на претседателската трка да не го видиме уште неколку дена, односно конечниот резултат да не биде познат со денови, а таквата неизвесност може да биде во корист на златото.

Bloomberg Mercury

Некои инвеститори во последните недели на големо се обложуваа на победа на Трамп. Сите трансакции поврзани со агендата на Трамп го поттикнуваат доларот. Сепак, ако победи тој, нервозата поради големите трговски тарифи што ги ветува Трамп може да ги натера инвеститорите да се повлечат и пренасочат кон златните прачки, кои претставуваат засолниште.

„Иако посилниот американски долар и повисоките приноси во победата на Трамп може да бидат спротивставени ветришта за златото, тоа ќе биде избалансирано со потенцијалната побарувачка во случај на какви било трговски тензии поради потенцијалните царини“, рече Џун Ронг Јеап, пазарен стратег со „ИГ Азија“ (IG Asia Pte).

Златото годинава порасна за повеќе од 30 проценти во рекордна низа на тргување, поттикната од зголемените геополитички и економски ризици, што беше причина за раст на купувањето злато и од централните банки и од потрошувачите. Растот се интензивира во последните неколку месеци главно бидејќи Фед (американските Федерални резерви) се насочи кон намалување на стапките, а се наѕираа и изборите во САД.

Златото во рамките на азиското тргување денеска падна за 1,3 отсто, на 2.708,48 долари за унца, а индексот за доларот на „Блумберг“ се искачи за 1,6 проценти. Среброто, платината и паладиумот паднаа.