Нов рекорд на биткоинот: Се искачи на над 75.000 долари

Биткоинот се искачи на рекордно високо ниво додека трговците ширум светот ги следат резултатите од претседателските избори во САД. Криптовалутата порасна за повеќе од 8 отсто, искачувајќи се над 75.000 долари во 22:08 часот во Њујорк. Со тоа го надмина мартовскиот рекорд.

Биткоинот ги зголеми добивките бидејќи Трамп рано го презеде водството, но трката останува далеку од решена. Со затворање на гласачките места во повеќе од две третини од државите, Трамп рано го презеде водството во Џорџија и Северна Каролина, две клучни сојузни држави, додека пребројувањето беше во рана фаза во другите.

„Тоа мора да биде затоа што раните бројки изгледаат добро за Трамп“, рече Фредрик Колинс, извршен директор и основач на платформата за крипто податоци „Вело дата“. „Според мене, биткоинот е еден од најдобрите инструменти за тргување на изборите. Тој е силно поврзан со исходот. Значи, прилично е безбедно да се претпостави дека секое зголемување на цените е поврзано со зголемување на шансите за победа на Трамп“.

Другите токени, исто така, се зголемија, етериум, втората по големина криптовалута, скокна за 6,5 отсто. Доџкоин, промовиран од поддржувачот на Трамп, Илон Маск, се зголеми за 18 отсто.

„Доџ, поради неговата поврзаност со Маск, беше особено корисен“, рече Космо Џианг, генерален партнер во инвестициската фирма „Пантера“ фокусирана на крипто.

Криптото се наметна во политичката дебата благодарение на огромниот фонд за финансирање кампањи кој го одреди криптоиндустријата со цел да ја унапреди својата агенда. Биткоинот некои го сметаат за „трговија со Трамп“, бидејќи републиканскиот претседателски кандидат Трамп го прифати дигиталното средство за време на неговата кампања.

Трамп се појави како најпријателски кандидат за индустријата со ветување дека ќе ги направи САД главна крипто дестинација на планетата. Тој ја зајакна својата поддршка меѓу крипто ентузијастите со лансирање на свои проекти. Харис усвои помирен пристап, ветувајќи поддршка за регулаторна рамка за индустријата.

Вредноста на американските акции продолжи да расте, како и приносите на државните обврзници, објави „Блумберг“. Фјучерсите на S&P 500 пораснаа за 1,3 отсто, приносите на 10-годишните трезори скокнаа за 17 базични поени на четиримесечен максимум од 4,44 отсто.

Индексот за доларот на „Блумберг“ порасна за 1,4 отсто бидејќи инвеститорите бараа засолниште на пазарот, имајќи ги предвид потенцијалните придобивки од политиките на администрацијата на Трамп со ниски даноци и високи тарифи.

Акциите на „Трамп медиа“ скокнаа за повеќе од 25 проценти. Раст бележи и „Тесла“ бидејќи компанијата е во единствена позиција на овие избори да има корист од победата на демократите со оглед на поддршката на партијата за индустријата за електрични возила, додека во исто време поддршката на Илон Маск за Трамп значи дека победата на републиканците може да претставува позитивен исход за производителот на автомобили.