.webp){kind=icon}
Најмалку два пловечки терминала за течен природен гас (ЛНГ) ќе се упатат кон Европа во следните неколку месеци, како дел од настојувањата на регионот да го замени снабдувањето, по прекинот што настана по руската инвазија на Украина.
„Глолар“ (Golar LNG Ltd.) трансформира танкер за ЛНГ во пловечки терминал кој се очекува да започне со увоз на гас во близина на западниот брег на Италија во првата половина на следната година, соопшти компанијата во презентација во четвртокот. Пловилото беше продадено на италијанската гасна мрежа, Snam SpA, во мај. Уште еден танкер на „Голар“ е во процес на пренамена.
„Екселерејт енерџи“ (Excelerate Energy Inc.), пак, во четвртокот соопшти дека нејзиниот пловечки терминал за LNG ќе се упати кон Финска од Аргентина по 31 август. Компанијата оваа нeдела потпиша писмо за намери со јужнокорејската „Хјундаи хеви индустрис“ (Hyundai Heavy Industries) за изградба на нова пловечка единица која е закажана за испорака во 2026 година.
Најавите доаѓаат во време на глобален недостиг на опрема за производство на течен природен гас и увоз во Европа, каде земјите брзаат да ја намалат зависноста од рускиот гас. Во моментот, има 45 бродови ширум светот кои можат да се користат како пловечки единици за увоз на ЛНГ, според бројките на Меѓународната унија за гас.
