Златото на ценовна лулашка поради неизвесноста од царините на Трамп

Златото утрово напредуваше, по неговиот најголем еднодневен пад во последните два месеца поради нервозата што ја предизвикуваат најновите трговски закани на претседателот Доналд Трамп.

Златните прачки денеска се тргуваат близу 2.900 долари за унца, откако во петокот паднаа за 1,6 отсто. Денешните добивки доаѓаат дури откако 14-дневниот индекс на релативна сила - мерач на темпото и интензитетот на движењето - покажа дека благородниот метал достигнал нивоа на преголемо купување во последните сесии.

„Учесниците на пазарот чекаат повеќе информации во врска со реципрочните тарифни планови на Трамп, кои би можеле да ги зголемат глобалните трговски тензии“, рече Манав Моди, аналитичар во „Мотилал освал фајненшл сервисис“ (Motilal Oswal Financial Services Ltd).

Bloomberg Mercury

 

И покрај стравот од тоа што следно може да направи Трамп, постојат шпекулации дека царинските закани главно се користат како преговарачка алатка. Трговските политики на неговата администрација стануваат сè позаматени поради одложувањата и исклучувањата, при што геополитичките и економските несигурности имаат тенденција да ја зголемат привлечноста на златото.

Трговците исто така ги проучуваа најновите американски економски податоци за индиции за веројатниот пат на каматно олеснување од страна на Федералните резерви, откако извештајот во петокот покажа дека продажбата на мало опаднала најмногу за речиси две години. Бројките ги поттикнаа трговците да ги вратат облозите дека централната банка ќе ги намали каматните стапки до септември. Пониските трошоци за задолжување обично го погодуваат златото, бидејќи за него не се плаќа камата.

И покрај падот во петокот, златото сè уште го забележа седмиот последователен неделен напредок, најдолгата победничка серија од 2020 година. Тоа делумно е помогнато од континуираното купување од централните банки, вклучувајќи и од кинеската, заедно со зголемувањето на акциите во фондовите што се тргуваат со берза.

Златото во вторникот достигна историски највисока вредност од 2.942,68 долари за унца, а вкупно во неделата што измина ја зголеми својата вредност за 0,8 проценти.

Утрово тој благороден метал поскапе за 0,6 проценти и на азиските берзи се тргуваше по цена од 2.899,81 долари за унца. Индексот Bloomberg Dollar Spot се намали за 0,1 отсто. Паладиумот ја зголеми својата вредност за повеќе од еден отсто, а напредуваа и среброто и платината.